Otbasyn buzyp, ajyrasatyndardyń eń kóp úlesi Almaty qalasyna tıesili.
Bul týraly QR Bas prokýratýrasy Quqyqtyq statısıka jáne arnaıy esepke alý jónindegi komıteti azamattyq jáne ákimshilik salalardaǵy quqyqtyq aqparatty qalyptastyrý basqarmasynyń basshysy Damılá Hamıtova aıtty, dep habarlaıdy Almaty-akshamy.kz.
Bas prokýratýranyń Quqyqtyq statısıka jáne arnaıy esepke alý jónindegi komıtetiniń dereginshe, bıylǵy 6 aıda sot neke jáne otbasy daýlaryna qatysty 23 755 azamattyq is qaralyp, 22 341-i qanaǵattandyrylǵan. Onyń ishinde nekeni buzý týraly 18 282, alıment óndirý boıynsha 1 510 azamattyq is qaralǵan.
Eń kóp nekeni buzý týraly azamattyq ister Almaty qalasynda (2564), Almaty oblysynda (2048), Nur-Sultan qalasynda (1604), Qaraǵandy oblysynda (1538) tirkelgen. 2021 jyldyń jarty jylymen salystyrǵanda Almaty qalasynda 8%-ǵa, Nur-Sultan qalasynda 2%-ǵa neke buzý derekteri artsa, qalǵan óńirlerde ajyrasý sany azaıǵan.
«Otbasynyń ajyrasýy kámeletke tolmaǵan balalarǵa aýyr soqqy bolary anyq. Ákelerdiń óz urpaǵyna qaıyrymsyz bolýy ana men balanyń turmystyq jaǵdaıyn nasharlatady. Qazir respýblıka boıynsha 3 949 027 boryshker sot oryndaýshynyń esebinde tur. Onyń 133 myńnan astamy ǵana alımentti óz erkimen tóleıdi, qalǵany túrli sebeppen alıment tóleýden jaltarýda», - dedi spıker.
Alıment tóleýden jaltaryp júrgenderge qatysty shet elge shyǵýǵa, bank operasıalaryn jasaýǵa, shottaryndaǵy qarajatty paıdalanýǵa, múlikke tyıym salý sıaqty shekteýler qoıylǵan. Sonymen birge jumyssyz boryshkerlerdi turaqty túrde jumyspen qamtý sharalary qarastyrylýda.
«Osy turǵyda ana men balaǵa qatysty quqyqbuzýshylyqqa jol bergen tulǵalardyń jaýapkershiligin kúsheıtý úshin birneshe zańǵa ózgerister men tolyqtyrýlar endi. Keı boryshkerler balanyń kámelet jasyna tolǵanyn kútip, bereshekten qutylamyn degen oımen alıment tólemeýi múmkin. Balanyń kámelet jasyna tolǵany boryshkerdi bereshekten bosatpaıdy. Erli-zaıyptynyń oılary men maqsattary bir arnaǵa toǵyspaı ajyrasýyna bala kináli emes. Sol sebepti, ana qolynda qalǵan urpaǵyna ákesiniń moraldyq, materıaldyq járdem kórsetýi – onyń paryzy. Egemendi elimizdiń erteńgi bolashaǵy – jas urpaq. Balanyń bilimdi, densaýlyǵy myqty azamat bolyp ósýi úshin ata-ana nekesin buzsa da, teńdeı qamqorlyq jasaǵany abzal», - deıdi Damılá Hamıtova óz sózinde.