Bul týraly Úkimet jıynynda belgili boldy
QR Premer-Mınıstri Asqar Mamınniń tóraǵalyǵymen ótken Úkimet otyrysynda Qazaqstannyń qurylys salasyn damytý máseleleri qaraldy, dep habarlaıdy Almaty-akshamy.kz
Indýstrıa jáne ınfraqurylymdyq damý mınıstri Beıbit Atamqulov, «Samuryq-Qazyna» AQ basqarma tóraǵasy Almasadam Sátqalıev, «Báıterek» UBH» AQ basqarma tóraǵasy Aıdar Áriphanov, Aqmola oblysynyń ákimi Ermek Marjyqpaev, Shymkent qalasynyń ákimi Murat Áıtenov baıandama jasady.
Indýstrıa jáne ınfraqurylymdyq damý mınıstri Beıbit Atamqulovtyń aıtýynsha, qurylys salasy – ekonomıkanyń belsendi damyp kele jatqan salalarynyń biri.
Ol ekonomıkanyń aralas sektorlaryn biriktiredi, áleýmettik mańyzy zor jáne ekonomıkalyq ósimniń lokomotıvi. 2020 jyldyń qorytyndysynda eldiń jalpy ishki ónimindegi qurylys salasynyń úlesi 6,1% qurady. Bıyl 11 aıdyń qorytyndysynda qurylys jumystarynyń kólemi 4,6 trln teńge boldy.
Bul ótken jylǵydan 6,2% joǵary. Búgingi tańda qurylys salasynda 46 476 kásiporyn jumys isteıdi (onyń ishinde qurylys materıaldary óndirisinde – 2 420 kásiporyn. 641 myń qyzmetker men maman jumyspen qamtylǵan.
Memleket basshysynyń tapsyrmasyna sáıkes, sondaı-aq Nur Otan partıasynyń saılaýaldy baǵdarlamasyna sáıkes 2025 jylǵa deıin 103 mln sharshy metr turǵyn úı salý josparlanýda. 977 myń otbasy baspanamen qamtamasyz etiledi.