Qazaqstanda polıseıler qoǵamdyq oryndarda bet-álpetti jasyratyn kıim kıýge tyıym salatyn jańa zańnamaǵa engizilgen túzetýler boıynsha túsindirý jumystaryn bastady, - dep habarlaıdy Aqshamnews.kz Polisia.kz saıtyna silteme jasap.
Polısıa málimetinshe, bul ózgeristerdiń maqsaty — qoǵamdyq qaýipsizdikti kúsheıtý, tulǵany anyqtaýdy jeńildetý jáne qoǵamdyq tártipti saqtaý. Sondaı-aq, jańa erejeler azamattardyń quqyǵy men bostandyǵyn, sonyń ishinde dinı senimin buzbaıtyny atap ótildi.
Ýchaskelik ınspektorlardyń aıtýynsha, tyıym bet-álpetti tolyqtaı jaýyp, tanýǵa kedergi keltiretin kıimderge – mysaly, maska men nıkabqa qatysty. Al hıdjab, sheıla, hımar, al-amıra jáne betti jappaıtyn ózge de kıimderge bul shekteý qoldanylmaıdy.
Aýa raıynyń jaǵdaılaryna, medısınalyq qajettilikke, zań talaptaryn oryndaýǵa, qyzmettik mindetterge, sondaı-aq sporttyq nemese mádenı is-sharalarǵa qatysý men azamattyq qorǵanys qyzmetkerleriniń jumysyna baılanysty jaǵdaılarda bul tyıymnan erekshelikter qarastyrylǵan.
Túsindirý jumystary aıasynda polıseıler azamattarǵa quqyqbuzýshylyqtardyń aldyn alý sharalary týraly da eske saldy.
Eske salaıyq, bet-álpetti jasyratyn kıim kıýge tyıym salý týraly norma Qazaqstan Respýblıkasynyń "Quqyq qorǵaý qyzmetin, quqyq qorǵaý jáne arnaýly memlekettik organdar, azamattyq qorǵaý organdary men áskerı qyzmetshilerdiń turǵyn úımen qamtamasyz etilýi men áleýmettik qorǵalýyn jetildirý, sondaı-aq ishki ister organdary qyzmetindegi artyq zańnamalyq retteýdi alyp tastaý máseleleri boıynsha keıbir zańnamalyq aktilerge ózgerister men tolyqtyrýlar engizý týraly" Zańyna engizilgen bolatyn.
Bul zańǵa 30 maýsymda Prezıdent Qasym-Jomart Toqaev qol qoıdy.