4 shildede "Sporttyq Almaty" baǵdarlamasy aıasynda "Nursultan shyńy" alpınıadasy ótti. Álpınızmge qyzyǵýshylyǵy bar Almaty turǵyndary óz shyńyn Qazaqstan Respýblıkasy Táýelsizdiginiń 30 jyldyǵy men Astana kúnine arnady.
Uıymdastyrýshylardyń aıtýynsha, Nursultan shyńyna shyǵýǵa 16 jastan bastap nıet bildirgenderge ruqsat etildi. Alpınıada Medeý muz aıdynynan saǵat 5-te bastaldy.
"Sporttyq Almaty" qalalyq baǵdarlamasy aıasynda alpınıadany birinshi jyl ótkizip otyrǵan joqpyz. Bıylǵy is-shara Qazaqstan Respýblıkasy Táýelsizdiginiń 30 jyldyǵy men Astana kúnine arnaldy. Sharaǵa qatysýǵa nıet bildirýshiler qatary kóbeıip keledi. Adamdar otbasymen keledi. Qatysýshylar arasynda jastar men zeınetkerler kóp. Karantın sharalaryna baılanysty bıyl shekteýler boldy. Sondyqtan Nursultan shyńyna tájirıbesi bar 100 adam ǵana shyqty. Biz qatysýshylardy Komsomol shyńynda arnaıy jabdyqpen qamtamasyz etemiz. Shymbulaqta konserttik baǵdarlama men utys oıyndaryn uıymdastyrdyq. Eń bastysy, adamdar dán rıza, belsendilik tanytty. Qala ákimdigi men sport basqarmasyna qoldaý kórsetkenderi úshin alǵys aıtamyz", – dedi "Sporttyq Almaty" jobasynyń jetekshisi Erjan Muhanov.
"Sporttyq Almatynyń" tájirıbeli álpınıseri Shymbulaqqa deıin (2380 m), odan keıin Talǵar asýyna deıin (3200 m) ótti, Bogdanovıch muzdyǵyna deıin (3600 m) kóterilip, Komsomol asýyn (4000 m) baǵyndyryp, Nursultan shyńynda (4376 m) márege jetti. Álpınıserdiń aıtýynsha, Nursultan shyńy qalanyń kez-kelgen jerinen kórinedi. Qatysýshylar eń kóp taralǵan tásildi - Talǵar asýy arqyly kóterilýdi tańdady. Mánshúk Mámetova asýy arqyly da Nursultan shyńyna shyǵý múmkindigi bar.
Shyńdy baǵyndyrýǵa qatysqan almatylyq Valentına muzdyqtan ótken kezdegi áserimen bólisti.
"Men alpınıadaǵa birinshi ret qatystym. Bul bárimiz úshin ortaq mereke. Biz taýǵa shyǵýdy tańǵy altyda bastadyq. Búgin Bogdanovıch muzdyǵyna jettik (3600 m). Uıymdastyrýshylarǵa úlken rahmet! Tabıǵat aıasyndaǵy taza aýa, kóńil-kúıimiz de keremet. Osyndaı qyzyqty is-sharalarǵa kóbirek barǵym keledi, – deıdi alpınıada qatysýshysy Valentına Dmıtrıevna.
Bolatbek Beısenov te óz áserimen bólisti:
"Búgin alpınıadaǵa baılanysty tańǵy beste Nursultan shyńyna shyǵý úshin keldim. Jasym 55-te. Jaǵdaıym jaqsy. Taýǵa kóterilý ózińe degen senimdi kúsheıtedi. Menen de jasy úlken qatysýshylar boldy. Ár túrli jastaǵy adamdarmen birge alpınıadaǵa qatysyp, taýǵa shyǵý qyzyqty".
Aıta ketsek, "Shymbulaq – Nursultan shyńy" alpınıadasy jyl saıyn Almaty turǵyndary arasynda salaýatty ómir saltyn nasıhattaý maqsatynda ótkiziledi. Bıyl bul is-shara QR Táýelsizdiginiń 30 jyldyǵyna arnaldy. Uıymdastyrýshylardyń aıtýynsha, bul - eldiń jetistikterin baǵalaýǵa bolatyn erekshe kún.