Qazaqstanda veıpke túbegeıli tyıym salynýy múmkin.
Qazirgi tańda búkil álem úshin ózekti másele Astanada talqylandy. Búginde Qazaqstan veıp kontrabandasy boıynsha dúnıejúzinde 5 orynda tur.
Dárigerler túrli-tústi qutydan shyǵatyn tátti tútinge oqýshylar aldanyp otyr dep dabyl qaǵýda, dep habarlaıdy Almaty-akshamy.kz.
El Prezıdendi Qasym-Jomart Toqaev osy qaýipti úrdispen kúresýdi jaýaptylarǵa bes aı buryn tapsyrǵan. Óz sózinde «Veıp pen esirtkiniń arasy bir-aq qadam» dep shegelep aıtqan. Al dúnıejúzilik densaýlyq saqtaý uıymynyń qazaqstandyq keńse basshysy kalán shegetinderge de qatań túrde shekteý qoıý kerek deıdi.
«Ókinishke qaraı, búkil álem boıynsha kalán tutyný artyp barady. Kalán qoǵamdyq oryndarda, bólmelerde óte jıi paıdalanylady. Bul temeki shegýdiń pasıvti túrin arttyrady. Kalán tartylǵan bólmedegi aýa temeki shegilgen úıdegi aýanyń sapasymen birdeı. Ol báribir ýly. Biz bolashaq urpaqty osyndaı zıandy ónimderden qorǵaýymyz qajet», - dedi DDS uıymynyń Qazaqstandaǵy keńse basshysy Skender Syla.