Gýmanıtarlyq kómek Almaty áýejaıynan eki reıspen jiberiledi
Búgin, 2022 jylǵy 14 naýryzda, Almaty qalasynyń áýejaıynan Halyqaralyq gýmanıtarlyq kómek máseleleri jónindegi komısıa otyrysynyń hattamasyn, sondaı-aq Qazaqstan Respýblıkasy Prezıdentiniń tapsyrmasyn oryndaý úshin QR Densaýlyq saqtaý mınıstrligi Ýkraınaǵa gýmanıtarlyq kómek jiberdi, dep habarlaıdy Almaty-akshamy.kz QR Densaýlyq saqtaý mınıstrliginiń baspasóz qyzmetine silteme jasap.
Ýkraına azamattaryna gýmanıtarlyq kómek 2022 jylǵy 14 jáne 15 naýryzda Almaty qalasynyń áýejaıynan eki reıspen jiberiletin bolady.
QR Úkimeti janyndaǵy Halyqaralyq gýmanıtarlyq kómek kórsetý máseleleri jónindegi komısıa Ýkraına halqyna medısınalyq preparattar partıasyn bólý týraly sheshim qabyldady.
Qazaqstan basqa memleket tarapynan resmı ótinishke jaýap retinde gýmanıtarlyq kómek kórsetedi. Ýkraına tarapynan osyndaı ótinish túsken soń, Prezıdent Qasym-Jomart Toqaev ýkraın halqyna shuǵyl gýmanıtarlyq kómek kórsetý jóninde naqty tapsyrma berdi.
Ýkraına aýmaǵyna júkterdi qaýipsiz jetkizý úshin Qazaqstan Úkimeti Ýkraınaǵa halyqaralyq gýmanıtarlyq kómek alý jáne taratý úshin habtar ornalastyrylǵan kórshi memlekettermen kelisimge keldi.
«Osylaısha, QR Densaýlyq saqtaý mınıstrligi jáne QR Indýstrıa jáne ınfraqurylymdyq damý mınıstrligimen birlesip, Almaty - Katovıse (Polsha) baǵyty boıynsha gýmanıtarlyq júkti áýe kemesimen jetkizý máselesin qarastyrdy. Gýmanıtarlyq kómektiń jalpy salmaǵy 28,2 tonnany quraıdy, oǵan 17 dári-dármek kiredi: antıbıotıkter, qabynýǵa qarsy, jótelge qarsy jáne antıgıpertezıvti preparattar», - delingen habarlamada.