Qazaqstan 135 taýar túrin Qytaıǵa eksporttaýǵa daıyn.
Bul týraly Qazaqstan saýda vıse-mınıstri Qaırat Tórebaev aıtty, dep habarlaıdy Almaty-akshamy.kz
QHR komersıa mınıstriniń orynbasary Lın Szı Qytaıda qazaqstandyq ónimdi tanymal etý maqsatynda Nankın jáne Chendý qalalarynda ókildikter ashýdy usyndy.
Al Qazaqstan saýda vıse-mınıstri Qaırat Tórebaev eki el basshylarynyń ekijaqty taýar aınalymyn 40 mlrd dollarǵa jetkizý jónindegi mindetterine merzimnen buryn qol jetkizilgenin atap ótti.
"Biz Qytaı naryǵyna jetkiziletin qazaqstandyq ónimder nomenklatýrasyn odan ári ártaraptandyrýǵa nıettimiz. Qazaqstan 135 taýar pozısıasy boıynsha Qytaıǵa $1 mlrd somaǵa qaıta óńdelgen ónim eksportyn qosymsha arttyrýǵa daıyn", - dep habarlady Qaırat Tórebaev.
Onyń aıtýynsha, Qytaıǵa joǵary sapaly jáne ekologıalyq taza aýyl sharýashylyǵy ónimderin, onyń ishinde salqyndatylǵan et ónimderin, balyq ónimderin, qus etin jáne sýbónimderdi, shoshqa etin, jumyrtqa, jylqy etin jáne basqa da joǵary marjınaldy taýarlardyń kóptegen túrin jetkizýge bolady.
Qazaqstandyq taýar óndirýshiler Shanhaı EXPO, "Qytaı-Eýrazıa Ekspo" jáne basqa da kóptegen kórmege belsendi qatysýda.
Osy jyldyń mamyr aıynda Urumchi qalasynda QazTrade saýda ókildigi tirkeldi. Sondaı-aq Chendý qalasynda qytaılyq kompanıamen birlesip QazTrade seriktestik keńsesi ashyldy. Sondaı-aq Nankın qalasynda qazaqstandyq ónimniń saýda pavılonyn iske qosý josparlanyp otyr.
Taraptar ekijaqty taýar aınalymynyń qurylymyn odan ári ulǵaıtý jáne keńeıtý úshin birlesken sharalar qabyldaý, sondaı-aq elektrondy komersıa, aýyl sharýashylyǵy, shekara mańy yntymaqtastyǵy jáne t.b. salalardaǵy saýdanyń ósýi úshin jańa múmkindikterdi izdestirý týraly kelisti.