Mundaı sheshim 6 sáýir kúni qabyldanǵan.
Qazaqstannyń Qyrǵyzstan, Ózbekstan jáne Reseı memleketterimen aradaǵy qurlyq shekarasyndaǵy shekteýler alyndy, dep habarlaıdy Almaty-akshamy.kz QazAqparatqa silteme jasap.
El aýmaǵynda koronavırýstyq ınfeksıanyń taralýyna jol bermeý jónindegi vedomstvoaralyq komısıa mundaı sheshimdi 6 sáýir kúni qabyldaǵan. Atalǵan qujatqa sáıkes, búginnen bastap shekaralas elder arasynda azamattar ótkizý beketterin shekteýsiz kesip óte alady.
Sondaı-aq Qazaqstannyń memlekettik shekarasyn áýeqatynasy arqyly kesip ótýge belgilengen barlyq shekteýler toqtatyldy. Biraq PTR ádisimen COVID-19 zertteýiniń teris nátıjesi bar anyqtamany nemese qazaqstandyqtar men Qazaqstan aýmaǵynda turýǵa yqtıarhaty bar shetel azamattary vaksınalaý, revaksınalaýdyń tolyq kýrsynan ótkendigin rastaıtyn qujatty mindetti túrde usyný jónindegi talap saqtalatynyn este saqtaý qajet.