Ákimdikterdiń deregi boıynsha 2024 jyly qazaqstandyq sharýalar 158 myń gektar jerge sý únemdeý tehnologıalaryn engizdi.
Atap aıtqanda, 56 myń gektar egis alqabyna tabıǵı jaýyn–shashyndy ımıtasıalaıtyn jańbyrlatyp sýarý júıeleri, 44 myń gektarǵa sýdy ósimdikterdiń tamyryna tikeleı jetkizetin tamshylatyp sýarý júıeleri engizildi, dep habarlaıdy aqshamnews.kz sala mınıstrligine silteme jasap.
«Bizge berilgen tapsyrmalardyń qalaı oryndalyp jatqany jáne osy baǵyttaǵy josparymyz týraly halyqqa esep berý qajet dep sanaımyn. Aqparatty kezeń-kezeńimen jarıalaımyn»,- dedi Sý resýrstary jáne ırrıgasıa mınıstri Nurjan Nurjigitov.
Mınıstr 58 myń gektarǵa jýyq jer lazerlik josparlaýshy arqyly tegistelgenin málimdedi. Egis alqaptaryn tegisteý sýarý tıimdiligin arttyra otyryp, sýarmaly sýdy birkelki taratýǵa múmkindik beredi.
2024 jyly Sý resýrstary jáne ırrıgasıa mınıstrligi Aýyl sharýashylyǵy mınıstrligimen birge sharýalardy qajet ınfraqurylymdy qalyptastyrý, sý únemdeý júıelerin satyp alý jáne ornatý shyǵyndaryn sýbsıdıalaý mólsherin 50%-dan 80%-ǵa deıin arttyrdy.
Sonymen qatar, búgingi tańda sý únemdeý tehnologıasyn qoldanatyn dıhandar sýarmaly sý úshin az tóleıdi. Sebebi, sý únemdeý júıelerin paıdalaný kezinde sýarmaly sý aqysyn sýbsıdıalaý mólsheri tarıfke baılanysty 85%-ǵa deıin ulǵaıtyldy.
Al oblystyq ákimdikterge sý únemdeý tehnologıalaryn engizý ındıkatorlary belgilendi. Ákimdikter óz kezeginde egis alqaptarynda sý únemdeý júıelerin engizýdiń 2030 jylǵa deıingi josparyn ázirlep, bekitti.
Jalpy, Qazaq Sý sharýashylyǵy ǵylymı-zertteý ınstıtýtynyń esebi boıynsha sý únemdeý tehnologıalaryn paıdalaný 30%-ǵa deıin sý únemdeýge múmkindik beredi.
Búgingi tańda Qazaqstanda sý shashatyn mashınalar men tamshylatyp sýarý jabdyǵyn shyǵaratyn tórt otandyq zaýyt jumys isteıdi. Bul rette sheteldik kásiporyndardy tartý boıynsha da belsendi jumys júrgizilýde. Mysaly, Kazakh Invest ulttyq kompanıasymen birge elimizde eki túrik jáne bir qytaı kompanıalarynyń jańbyrlatyp sýarý mashınalaryn shyǵarýdy iske qosý boıynsha úsh joba iske asyrylyp jatyr.
Sonymen qatar, bıyl Túrkistan oblysynda qytaılyq kompanıalarmen birlesip tamshylatyp sýarý jabdyǵyn shyǵaratyn eki zaýyt ashý josparlanyp otyr.
Sondaı-aq, bizdiń mınıstrlik sý únemdeıtin ınovasıalyq tehnologıalardy synaqtan ótkizýde. Máselen, byltyr elimizdiń jetekshi ǵylymı-zertteý ınstıtýttarymen birlesip majarlyq Water-Retainer preparaty synaqtan ótti. Synaq nátıjesi jekelegen daqyldar boıynsha sý únemdeý jáne ónimdilikti arttyrý boıynsha oń áserin kórsetti. Aldyn ala málimet boıynsha, preparatty qoldaný shamamen 20-37% sý únemdeýge múmkindik beredi, sonymen qatar ónimdilikti jaqsartady.
«Memleket basshysy Úkimettiń keńeıtilgen otyrysynda sý únemdeý tehnologıalaryn engizý qajettigin taǵy da atap ótti. Prezıdent osyǵan deıin, 2023 jylǵy Joldaýynda elimizde jyl saıyn 150 myń gektar jerge sý únemdeý tehnologıalaryn engizý mindetin qoıǵan bolatyn. Bizdiń mınıstrlik júzege asyryp jatqan is-sharalar osy nátıjege qol jetkizýge baǵyttalyp otyr»,- dedi Sý resýrstary jáne ırrıgasıa mınıstri Nurjan Nurjigitov.