Búgin Senattyń jalpy otyrysynan keıin tilshiler Saýda jáne ıntegrasıa vıse-mınıstri Qaırat Tórebaevtan Reseı men Ýkraına qaqtyǵysy bastalǵaly Qazaqstan RF aýmaǵyna qandaı taýarlar eksportyn toqtatqanyn surady, dep habarlaıdy almaty-akshamy.kz.
«Jalpy, biz barlyq taýardy eksportqa shyǵaryp jatyrmyz. Tek Reseıge soǵysqa qatysty eksporttyq taýarlardy shektedik. Bul tizimge 106 túrli taýar endi. Biz olar boıynsha eksportqa múldem tyıym saldyq»,– dedi Q. Tórebaev.
Bul turǵyda vıse-mınıstr atalǵan ónimderdiń arasynda qaqtyǵys kezinde qarýdyń bólshegi retinde paıdalanýǵa bolatyn taýarlar shektelgenin naqtylady.
«Olar soǵysqa qatysty taýarlar. Osy ónimder Reseıge shyǵarylmaıdy. Sonyń arasynda qaqtyǵys kezinde qoldanylatyn drondar, arnaıy elektronıka, chıpter jáne basqa da qurylǵylar bar», – dedi mınıstrlik ókili.
Onyń sózine qaraǵanda, atalǵan 106 taýar Qazaqstanda óndirilmeıdi. Buryndary bul ónimder elimizdiń aýmaǵy arqyly eksportqa shyǵarylǵan edi. Qazir osy taýarlar elimizge ımporttalǵanymen, Reseıge shyǵarylmaıdy.
Budan buryn habarlanǵandaı, bıyl mamyr aıynda Premer-Mınıstrdiń orynbasary – Qarjy mınıstri Erulan Jamaýbaev Qazaqstan qaıtalama sanksıalarǵa jol berilmeıtinin aıtty.