Qazaqstan Respýblıkasynyń Prezıdenti Qasym-Jomart Toqaev Reseı Federasıasyna eksportty arttyrýǵa daıyn ekenin málimdedi, dep habarlaıdy Almaty-akshamy.kz.
«Qazirgi tańda óndiristik qýatymyzdy damyta otyryp, biz ózara tıimdi negizde sheteldik ónimderdiń kóptegen túrlerin bir-birimen almastyra alamyz. Eksporttyq-ımporttyq operasıalardy taldaý bul baǵytta keń múmkindikter baryn kórsetedi», - dedi Qasym-Jomart Toqaev búgin Astanada ótip jatqan «Ortalyq Azıa-Reseı» samıtinde.
Osyǵan baılanysty Prezıdent mysaldar keltirdi.
«Máselen, Qazaqstan Ortalyq Azıa elderine eksportty 1 mlrd dollarǵa arttyrýǵa daıyn. Sondaı-aq qazaqstandyq ónimderdi Reseı Federasıasyna jetkizýdi 1 mıllıard dollardan astam kólemde ulǵaıta alamyz. Óńirdiń basqa memleketterinde de osyndaı resýrstar bar ekenine senimdimin», - dep túıindedi sózin Memleket basshysy.