Qazaqstan-Qytaı shekarasyndaǵy júrgizilip jatqan tekserýler taýarlardy kedendik shekara arqyly zańdy túrde ótkizýge kedergi keltirmeıdi.
Bul týraly QR QM Memlekettik kirister komıteti habarlady. Qazirgi ýaqytta Memleket basshysynyń tapsyrmasy sheńberinde Bas prokýratýra, Qarjy monıtorıńi agenttigi jáne Qarjy mınıstrligi ókilderinen arnaıy qurylǵan jumys toby qazaqstan-qytaı shekarasynda tekserýlerdi júrgizýde, dep habarlaıdy Almaty-akshamy.kz 24.kz-ke silteme jasap.
Tekserý tek qana ýákiletti ekonomıkalyq operatorlar mártebesi bar ımporttaýshylarǵa qatysty júzege asyrylady. Tekserý qorytyndysy boıynsha Qazaqstan Respýblıkasynyń zańnamasynda kózdelgen sharalar qabyldanatyn bolady. Júrgizil jatqan tekserýler taýarlardy kedendik shekara arqyly zańdy túrde ótkizýge kedergi keltirmeıdi jáne adal bıznes syrtqy ekonomıkalyq qyzmetti shekteýsiz júzege asyrady.
2021 jyldyń qorytyndysy boıynsha, naryqta QHR-men ımporttyq operasıalardy júzege asyratyn 7241 syrtqy ekonomıkalyq qyzmetke qatysýshylar jumys isteıdi, onyń ishinde 17 sýbekti ÝEO bolyp tabylady, olarǵa ımporttyń barlyq kóleminiń 18% tıesili. Bul rette 5 ÝEO – óz muqtajdary úshin ónimderdi ımporttaıtyn óndiristik sektor jáne 2 ÝEO kvazımemlekettik sektor («Qazpochta» AQ jáne «QTJ» AQ enshiles uıymy – «KTZ Express» AQ).
Atap aıtqanda, sondaı-aq «KTZ Express» AQ kedendik ókil jáne halyqaralyq ekspedıtor bolyp tabylady, qazaqstan-qytaı shekarasynda ózindik ınfraqurylymy bar. Ortalyq Azıadaǵy eń iri «KTZE-Khorgos Gateway» qurǵaq portymen jumys isteıdi, sondaı-aq KIF Warehouses A synypty qoıma bólmelerine ıe. Operatordyń basty artyqshylyǵy – tapsyrys berýshiler úshin de, fıskaldyq organdar úshin de ashyq qyzmeti. Jalpy qazaqstan-qytaı shekarasyndaǵy ótkizý pýnktteri men taýarlardy kedendik tazartýdyń ózge de oryndary belgilengen jumys rejımine sáıkes qyzmet jasaýyn jalǵastyrýda.