Hústonda eń úlken FIRST Championship chempıonaty aıaqtaldy. Oǵan álemniń 55-ten astam elinen 50 myń oqýshy qatysty.
Bıyl Qazaqstan quramasynda FIRST LEGO LEAGUE EXPLORE kishi sanatynda Astana qalasynydaǵy Quantum STEM School mektebinen IQ Robots komandasy, FIRST LEGO LEAGUE CHALLENGE orta sanatynda - Shymkent qalasy Robopark mektebinen Shymside komandasy, al FIRST Tech CHALLENGE joǵary sanatynda - Almaty qalasyndaǵy FMB NZM-nen Yaku komandasy jáne Almaty qalasyndaǵy RFMM-nen Bolt.M3 komandasy boldy, dep habarlaıdy Almaty-akshamy.kz Oqý-aǵartý mınıstrligine silteme jasap.
Bıylǵy quramanyń nátıjeleri:
6-10 jas aralyǵyndaǵy bastaýysh synyp oqýshylary qatysatyn IQ Robots komandasy úzdik tanystyrylym jáne joba ıdeıasy úshin Best Poster Award nomınasıasynda jeńiske jetti.
Joǵary synyp oqýshylarynan quralǵan Bolt.M3 komandasy Motivate Award bedeldi júldesin qanjyǵalady. Aıta ketý kerek, bul marapat óz elinde jáne odan tys jerlerde STEM-di tanymal etýge úles qosqan komandaǵa beriledi.
Sondaı-aq, 10-16 jas aralyǵyndaǵy oqýshylardy biriktirgen Shymside komandasy jahandyq STEM qozǵalysynyń mańyzdy krıterııi bolyp tabylatyn FIRST baǵdarlamasynyń komandalyq rýhy men negizgi qundylyqtaryn kórsetti. Sonymen qatar, is-shara uıymdastyrýshylary Shymside komandasyn osy maýsymǵa arnalǵan derekti fılmge túsirdi.
«Bizdiń balalar chempıonattyń barlyq úsh kúninde kóshbasshylar qatarynan kórindi. Olardyń alańdaǵy oıyndaryn, jeńisteri men jeńilisterin kórý, qazylar alqasynyń múshelerimen suhbatyn kýlýarda kútý sátteri óte qyzyqty boldy. Balalarymyzda óte myqty robottar, ınjenerlik jobalar, aıdentıka jáne negizgi qundylyqtar bar. Bizdiń balalarymyzdy álemniń túkpir - túkpirinen jınalǵan 50000-nan astam oqýshy arasynda baıqamaý múmkin emes. Máselen Bolt.M3 komandasy ıelengen júlde TMD elderiniń arasyndaǵy mundaı alǵashqy marapat» - deıdi «Daryn» RǴPO dırektory Ǵajdembek Tursynov.
Esterińizge sala keteıik, Qazaqstan quramasy Oqý-aǵartý mınıstrliginiń qoldaýymen «USTEM Foundation» qoǵamdyq qory men «Daryn» RǴPO uıymdastyrǵan Central Asia FIRST Championship Ortalyq Azıa chempıonatynyń nátıjesi negizinde jasaqtalǵan bolatyn. Chempıonatta jeńiske jetken oqýshylar álemdik joǵary oqý oryndaryndaǵy stıpendıalar men granttarǵa qol jetkizýge múmkindik alady.