Qazaqstan Qorǵanys mınıstri general-polkovnık Rýslan Jaqsylyqovtyń basshylyǵymen qazaqstandyq delegasıa Italıanyń qorǵanys vedomstvosy men áskerı nysandaryn aralady. Sapar aıasynda general-polkovnık Rýslan Jaqsylyqov Italıanyń Qorǵanys mınıstri Gvıdo Krozettomen kezdesti. Taraptar ekijaqty áskerı yntymaqtastyqtyń negizgi máselelerin, onyń ishinde áskerı bilim berý, jaýyngerlik daıyndyq jáne bitimgerlik qyzmetti talqylady.
Bul týraly aqshamnews.kz Qorǵanys mınıstrliginiń baspasóz qyzmetine silteme jasaı otyryp habarlaıdy.
General-polkovnık Rýslan Jaqsylyqov halyqaralyq arenada Qazaqstan úshin bitimgerlik qyzmettiń mańyzdylyǵyn atap ótti. Ol qazaqstandyq ofıserlerdiń "BUU-nyń Lıvandaǵy ýaqytsha kúshteri" mısıasyna, Italıa kontıngentiniń quramynda tabysty yntymaqtastyqtyń úlgisi retinde qatysýynyń mańyzdylyǵyn atap ótti.
Kelissózder Qazaqstan Respýblıkasynyń Ulttyq qorǵanys ýnıversıteti men Italıa Qarýly kúshteri Bas shtabynyń Joǵary qorǵanys zertteýleri ortalyǵy arasyndaǵy ózara is-qımyl úshin jańa múmkindikter ashatyn akademıalyq yntymaqtastyq jáne ǵylymı zertteýler týraly memorandým jasasýmen aıaqtaldy.
Sapar aıasynda delegasıa sonymen qatar Pratıka-Dı-Mare teńiz avıabazasyna jáne ıtalándyq áýe kúshteriniń áskerı áýejaıyna bardy. Munda eń iri ıtalándyq "Leonardo" korporasıasynyń ókilderi jaýyngerlik tikushaqtar men C4I áskerlerin basqarýdyń avtomattandyrylǵan júıesiniń jumys isteýin qamtamasyz etetin baǵdarlamalyq quraldardy kórsetti.
Qazaqstandyq delegasıa Rımnen 119 shaqyrym jerde ornalasqan "Akýıla" taý daıyndyǵy bazasynda da boldy. Munda olar Italıa Qurlyq áskerleri Alpi polkiniń ınfraqurylymymen, jabdyqtarymen jáne áskerı qyzmetshilerdi oqytý baǵdarlamasymen tanysty.