Qazaqstanǵa ákelinetin ımporttyq ónimder men taýarlardyń baǵasy bir jylda 13%-ǵa qymbattaǵan.
Aqpan aıynyń qorytyndysy boıynsha, ishki naryqtaǵy azyq-túlik taýarlarynyń tutynýshylyq baǵasy bir jyl ishinde 10 paıyzǵa ósti, dep habarlaıdy Almaty-akshamy.kz Energyprom.kz saıtyna silteme jasap.
Bıylǵy jyldyń qańtar aıynyń qorytyndysy boıynsha, qazaqstandyq kompanıalar naryqtyń unǵa (suranystyń 99,7%-yn otandyq óndiris qamtamasyz etken), jumyrtqaǵa (97,2%), jarma men kúrishke (96,6%) qyzyl et pen qus etine (95,5%), ósimdik maıyna (88,8%), sondaı-aq makaron ónimderi, kespe jáne basqa da soǵan uqsas un ónimderge (85,1%) qajettiligin jetkilikti deńgeıde jergilikti ónimmen qamtamasyz ete aldy.
Sút ónimderiniń segmentine keletin bolsaq (jańa sútti qospaǵanda), munda tutastaı alǵanda búkil ónim jelisi boıynsha ózin-ózi qamtamasyz etý deńgeıi jaman emes, ıaǵnı 84,4% kórsetkishke ıe, degenmen jekelegen ónim toptary boıynsha jaǵdaı basqasha ekeni baıqaldy. Osylaısha, jergilikti kompanıalar sary maıǵa degen suranysty nebári 67,9%-ǵa, al irimshik pen súzbege odan da az, nebári 53,7%-ǵa ǵana qamtamasyz ete alǵan.
Sonymen qatar, shujyq ónimderi (bul jerde jergilikti kompanıalar 62,3%), jemis-kókónis shyryndary (50,2%), óńdelgen jáne konservilengen balyq, shaıan tárizdiler men mollúskalar (47,6%), shokolad (36,2%) qant (35,8%), shaı jáne kofe (bar bolǵany 29,9%) sıaqty azyq-túlik sektorlary ımportqa táýeldi bolyp otyr.
Alkogól ónimderiniń ishinde jergilikti kompanıalar syraǵa degen suranysty 93,2%-ǵa, araq pen alkogóldik sýsyndarǵa – 77,9%-ǵa, konák pen konák sýsyndaryna – 58,6%-ǵa, sharaptarǵa – 49,4%-ǵa (biraq sharaptar arasynda tikeleı shampanǵa – 95,5%-ǵa) suranysty ótep otyr.
Aǵymdaǵy jyldyń qańtar aıynda ımporttyq ónimder men taýarlardyń baǵasy bir jyl ishinde 12,8%-ǵa ósti. Sonyń ishinde TMD elderinen keletin ónimderdiń Qazaqstan úshin ımporttyq baǵasynyń deńgeıi aıtarlyqtaı 21,3%-ǵa, basqa elderden tasymaldanatyn zattardyń baǵasy – 4,9%-ǵa ósti.
Azyq-túlik taýarlarynyń ishinde qant pen qant qosylatyn kondıterlik ónimderdiń (birden 38,7%), et, balyq nemese shaıan tárizdiler, mollúskalar jáne basqa da omyrtqasyz sý janýarlarynan alynǵan daıyn ónimder (32,3%), janýarlar nemese ósimdikten alynatyn toń maılar men maılar (26,9%-ǵa), shujyq jáne soǵan uqsas et ónimderi (20,6%-ǵa), balyq jáne ulýlar (19,6%-ǵa), kúnbaǵys maıy (15%-ǵa) baǵasy aıtarlyqtaı ósti.
Elimizdiń ishki naryǵynda aǵymdaǵy jyldyń aqpan aıynyń qorytyndysy boıynsha azyq-túlik taýarlarynyń tutynýshylyq baǵasy bir jyl ishinde 10 paıyzǵa qymbataǵan. Óńirlik turǵydan alǵanda, baǵanyń qatty qymbatshylyǵyn Aqmola, Mańǵystaý jáne Aqtóbe oblystarynyń turǵyndary sezindi.
Azyq-túlik ónimderiniń ishinde jarma (16%-ǵa), maı jáne toń maı (14,1%-ǵa), makaron ónimderi (12,5%-ǵa), jemister men kókónister (12,4%-ǵa), un (11,1%-ǵa), et (11,1%-ǵa), qant (11%-ǵa) baǵasy aıtarlyqtaı qymbattady.