Bul synaqtan Nur-Sultan, Almaty jáne Shymkent qalalary ótti.
QR Sıfrlyq damý, ınovasıalar jáne aeroǵarysh ónerkásibi mınıstrliginde ótken Qoǵamdyq keńestiń otyrysynda mekeme ókilderi atqarylǵan jumystar jaıly baıandady, dep jazady Almaty-akshamy.kz Egemen.kz silteme jasap.
Mınıstr Baǵdat Mýsın Qoǵamdyq keńestiń memlekettik organdar qyzmetindegi aıryqsha rólin atap ótti.
«Qoǵamdyq keńesterdiń arqasynda ózekti máseleler kóterilip, qoǵamdyq pikirler aıqyndalady. Azamattyq qoǵam men memleket birigip jumys istese, bizdiń jobalarymyz da nátıjeli jáne tıimdirek bolary sózsiz. Sizderdiń eseli eńbekterińiz ben kótergen bastamalaryńyzǵa alǵys aıtamyn»,- dedi Baǵdat Mýsın qoǵam belsendilerine.
SDIAÓM apparat basshysy Arman Kenjeǵalıev mınıstrliktiń búdjettik baǵdarlamasy birneshe strategıalyq baǵyt boıynsha, sonyń ishinde İT-salany damytý, memlekettik qyzmet kórsetý prosesin jetildirý, aqparattyq qaýipsizdik deńgeıin kóterý, aeroǵarysh salasy men taǵy basqa da baǵyttarda júzege asqanyn atap ótti.
«Strategıalyq baǵyttar boıynsha jalpy somasy 118 mlrd teńgege 10 búdjettik baǵdarlama iske asyryldy. Byltyr SDIAÓM 18 maqsatty ındıkatorǵa qol jetkizdi jáne kóbiniń kórsetkishi josparlanǵan mejeden asty», - dedi Arman Kenjeǵalıev.
Mınıstrlik pen mekemege qarasty uıymdar adamǵa baǵdarlanǵan servısterdi damytýǵa da kúsh salyp jatyr. Qazir 18 sıfrlyq qujat qoljetimdi jáne bultty ESQ engizildi.
Sondaı-aq negizgi áleýmettik mańyzy bar 23 memlekettik qyzmet proaktıvti nusqada usynylady. Mysaly, bala týý boıynsha memlekettik qyzmetterdi SMS arqyly alýǵa bolady, búginde 81 myń adamǵa osyndaı qyzmet kórsetilgen.
«Biz «vıdeoHQKO» jobasyn iske qostyq. Úıden shyqpaı-aq qyzmet alýǵa múmkindik beretin bul qyzmetti 17 650 azamat paıdalanǵan. Iaǵnı aldaǵy ýaqytta adamdar HQKO-ǵa barmaı-aq, qashyqtan konsýltasıa alyp, tipti memlekettik qyzmetterge de qol jetkize alady», - dedi SDIAÓM Strategıalyq josparlaý departamentiniń dırektory Meıirbek Muqatov.
Sońǵy jyldary baılanys sapasyna úlken kóńil bólinýde. 2021 jyly 628 eldi mekende ınternet sapasy jasqartylǵan, 2022 jyly 140 aýylda osy baǵyt boıynsha tıisti jumystar júrgizilip jatyr.
Bul rette azamattar tarapynan baılanys sapasyna resmı shaǵym túsetin bolsa, jospardan tys tekseris júrgiziledi. Zań buzýshylyqtar rastalǵan jaǵdaıda, operatorlarǵa aıyppul salynyp, baılanys sapasyn jóndeý týraly nusqama beriledi. 2021 jyly 562 tekserý jasalyp, jalpy somasy 132 mln astam teńgege aıyppul salyndy.
Nur-Sultan, Almaty jáne Shymkent qalalaryndaǵy 5G tehnologıasynyń synaǵy sátti ótti.
İT-bilimge beıimdelgen adamı kapıtaldy damytý júıesi mınıstrlik qyzmetindegi mańyzdy baǵyttardyń birine aınaldy.
«İT-fakýltetterdi İT-kompanıalardyń qamqorlyǵyna berý, «Vırtýaldy muǵalim» jobasyn engizý jumystary júrgizilip jatyr, 300 myń maman oqytyldy. İT-mamandyq boıynsha bilim alýǵa 100 vaýcher bólindi, ár vaýcherdiń quny 600 myń teńge. 2025 jylǵa qaraı 20 myń vaýcher berý josparlanǵan», - dedi Meıirbek Muqatov.
Geodezıa jáne kartografıa salasynda da jaqsy jumystar atqaryldy. Qazir Qazaqstan terıtorıasy 100 paıyzǵa sıfrlanǵan – 272 mln ga jer resýrsy, sonyń ishinde 22 mln ga egistik; 127,7 mln ga jaıylymdyq jer (68%); 18,6 mln ga ormandy alqap.
Jerdiń sıfrlyq nusqasyn jasaý barysynda 1,1 mln ga jaıylym men 19,6 mln ga egistiktiń ıgerýsiz jatqandyǵy, sondaı-aq 2 641 aǵash kesý polıgony, 6,5 mln ga órtengen jer, 7,3 myń zańsyz qoqys orny, keń taralǵan paıdaly qazbalardy zańsyz óndirý boıynsha 21 oqıǵa, jerdi zańsyz ıelený boıynsha 391 myń oqıǵa anyqtalǵan.