Kelissóz barysynda saýda-ekonomıkalyq baılanystardy arttyrýdaǵy birlesken is-qımylǵa erekshe nazar aýdaryldy
Beıjiń qalasyndaǵy Halyq jınalysy úıinde Qazaqstan Prezıdenti Qasym-Jomart Toqaev pen Qytaı Halyq Respýblıkasynyń Tóraǵasy Sı Szınpın kelissóz júrgizdi, dep habarlaıdy Almaty-akshamy.kz Aqordanyń baspasóz qyzmetine silteme jasap.
Ózara senim men dostyqqa negizdelgen kezdesýde kóshbasshylar Qazaqstan men Qytaı arasyndaǵy jan-jaqty strategıalyq seriktestiktiń, sonyń ishinde saıası, saýda-ekonomıkalyq, kólik-tranzıttik jáne mádenı-gýmanıtarlyq salalardyń aýqymdy máselelerin talqylady.
Qazaqstan Prezıdenti Qytaı Tóraǵasyna iltıpat bildirip, qysqy Olımpıada oıyndarynyń saltanatty ashylý rásimi keremet uıymdastyrylǵanyn atap ótti.
«Beıjińdegi Olımpıada oıyndary búkil adamzat úshin jaýapty sátte ótip jatyr. Bul sport saıystary jańarýǵa úndep, pandemıanyń syn-qaterlerin eńserýge úles qosady. Sondyqtan Sizdiń shaqyrýyńyzdy zor qýanyshpen qabyl aldym», – dedi Memleket basshysy.
Prezıdent elimizdegi jaǵdaıdy turaqtandyrýǵa baǵyttalǵan kúsh-jigerine berik dostyq nıetin bildirgeni, sondaı-aq Jańa Qazaqstan qurý jolynda qajetti kómek kórsetýge daıyndyǵy úshin Qytaı Tóraǵasyna rızashylyǵyn jetkizdi.
Sonymen qatar Qasym-Jomart Toqaev Sı Szınpınniń tıimdi basshylyǵymen qol jetkizgen Qytaı ekonomıkasynyń damý jetistikterine joǵary baǵa berdi.
Prezıdent dıplomatıalyq qatynastar ornaǵan 30 jyl ishindegi qazaq-qytaı qatynastarynyń damýy týraly aıta kele, eki eldiń kúsh biriktire otyryp, barlyq saladaǵy strategıalyq seriktestiktiń berik irgetasyn qalaǵanyna nazar aýdardy. Onyń pikirinshe, bul yntymaqtastyq máńgi, jan-jaqty jáne saıası konúnktýraǵa baǵynyshty emes.
Qazaqstan Prezıdenti búgingi kelissózdiń qazaq-qytaı qarym-qatynasy tarıhyndaǵy sapaly ári jańa kezeńge birlese qadam basýǵa múmkindik beretinin atap ótti.
Qasym-Jomart Toqaev qazaq-qytaı dostyǵyn, tatý kórshilik pen ózara syılastyqty nyǵaıtýda jańa tabystarǵa qol jetkizý úshin tyǵyz yntymaqtastyqqa ázir ekenin atap ótip, Sı Szınpındi bıylǵy qyrkúıekte Qazaqstanǵa memlekettik saparmen kelýge shaqyrdy.
Memleket basshysynyń pikirinshe, QHR Tóraǵasynyń sapary eki el arasyndaǵy strategıalyq seriktestikke tyń serpin beredi.
Kelissóz barysynda saýda-ekonomıkalyq baılanystardy arttyrýdaǵy birlesken is-qımylǵa erekshe nazar aýdaryldy. Prezıdent pandemıaǵa qaramastan, ekijaqty taýar aınalymy 2021 jyldyń qorytyndysy boıynsha 15,2 paıyzǵa ósip, 18,2 mıllıard dollarǵa jetkenin atap ótti. Qytaı men Ortalyq Azıanyń bes eli arasyndaǵy jalpy saýdanyń jartysy Qazaqstanǵa tıesili.
Sonymen qatar Qasym-Jomart Toqaev «Bir beldeý, bir jol» bastamasyn odan ári iske asyrý jónindegi basym mindetti atady. Memleket basshysy elimizdiń sıfrlyq tehnologıalar men kólik jáne logıstıka salalaryndaǵy yntymaqtastyqty nyǵatıýǵa múddeli ekenine toqtaldy.
Kelissóz barysynda týrızm jáne mádenı-gýmanıtarlyq baılanystar salasyndaǵy yntymaqtastyqty damytýdyń perspektıvasy, sondaı-aq Qazaqstanda qytaı mádenı ortalyǵyn ashý máselesi talqylandy.
QHR Tóraǵasy «birtutas Qytaı» qaǵıdatyna qoldaý kórsetkeni úshin Qasym-Jomart Toqaevqa alǵys aıtyp, strategıalyq yntymaqtastyqty odan ári jan-jaqty damytýǵa múddeli ekenine senim bildirdi.
Sı Szınpın Qazaqstan men QHR arasyndaǵy baılanystardyń aldaǵy 30 jyldaǵy altyn dáýirine osy kezdesý jol ashatynyn atap ótti.
QHR Tóraǵasy «Bir beldeý - bir jol» bastamasy júzege asyrylyp jatqan 9 jyl ishindegi oń yntymaqtastyqty atap ótti. Sondaı-aq Sı Szınpın aýyl sharýashylyǵy, jasyl energetıka, jasandy ıntellekt, qarjy jáne elektrondy saýda salalaryndaǵy ózara yqpaldastyqtyń keleshegine de basa mán berdi.
Qytaı basshysy Sı Szınpın Qasym-Jomart Toqaevtyń parasatty ári kóregen basshylyǵymen Qazaqstannyń qýatty ári órkendegen memleketke aınalatynyna senim bildirdi. Sondaı-aq ol Azıadaǵy ózara is-qımyl jáne senim sharalary jónindegi keńestiń jumysyna jáne onyń óńirlik qaýipsizdikti qamtamasyz etý jónindegi bastamalaryna joǵary baǵa berdi.
Kezdesý sońynda Sı Szınpın Qasym-Jomart Toqaevtyń Qazaqstanǵa shaqyrýyn qabyl alyp, aldaǵy kúzde elimizge memlekettik saparmen kelý jónindegi josparymen bólisti.
Sonymen qatar Sı Szınpın Qasym-Jomart Toqaevpen turaqty baılanys jasap turýǵa daıyn ekenin jetkizdi.