Qujat 2023 jyldyń 1 qańtarynan bastap qoldanysqa engiziledi.
Senat pen Májilistiń birlesken otyrysynda Parlamenttiń reglamentine engizilgen ózgerister men tolyqtyrýlar qabyldandy, dep habarlaıdy Almaty-akshamy.kz Inbusiness.kz cilteme jasap.
"Parlament reglamentine ózgerister men tolyqtyrýlar engizý týraly usynystardy qaraý boıynsha birlesken komısıa tıisti jumys júrgizdi. Birlesken komısıaǵa Parlament palatalary depýtattary men komıtetterinen 50-den astam usynys kelip tústi. Parlament reglamentine usynylatyn túzetýler elimizde júrgizilgen konstıtýsıalyq reformanyń erejelerin iske asyrý tártibin belgileıdi", – dedi Májilistiń Zańnama jáne sot-quqyqtyq reforma komıtetiniń tóraǵasy, depýtat Arman Qojahmetov.
Bul turǵyda ol osy mańyzdy ózgerister men tolyqtyrýlar týraly tolyǵyraq baıandady. Aıtýynsha, Konstıtýsıalyq zańdardy tek qana Parlament palatalarynyń birlesken otyrysynda qaraý týraly túzetýdiń Konstıtýsıaǵa engizilýine baılanysty osy tártipti Parlament reglamentinde bekitý usynylady.
"Atap aıtqanda, reglamentti "Konstıtýsıalyq zańdardy qabyldaý" dep atalatyn 4-1 jańa taraýmen tolyqtyrý usynyldy. Konstıtýsıalyq zańdardyń jobalary boıynsha keminde eki oqylym ótkizý mindetti bolady. Konstıtýsıalyq zań jobasy Parlament Májilisinde tirkeledi. Zań jobasynyń kóshirmesi eki kúnnen aspaıtyn merzimde Senatqa jiberiledi. Konstıtýsıalyq zań jobasyn birinshi oqylymda qaraý úshin Májilis tóraǵasy Parlament palatalarynyń birlesken otyrysyn shaqyrady, bul otyrysta jobanyń tujyrymdamasy talqylanady. Konstıtýsıalyq zań jobasynyń bastamashysy negizgi baıandama jasaıdy, odan keıin ár palatanyń qosymsha baıandamashylary sóz sóıleıdi. Sondaı-aq Parlament depýtattaryna kezekpen sóz usynylady", - dep túsindirdi Arman Qojahmetov.
Konstıtýsıalyq zań jobasyn ekinshi oqylymǵa ázirleý úshin Parlament palatalarynyń birlesken komısıasy qurylýy múmkin. Onyń quramy palatalardyń birlesken otyrysynda bekitiledi. Sondaı-aq, osy otyrysta birlesken komısıanyń tóraǵasy saılanady jáne bul komısıanyń jumys merzimi anyqtalady. Osylaısha ekinshi oqylymǵa deıin birlesken komısıa múddeli memlekettik organdardyń, qoǵamdyq birlestikterdiń ókilderin, ǵalymdar men sarapshylardy tarta otyryp, konstıtýsıalyq zań jobasy boıynsha turaqty komıtetter men depýtattardyń eskertýleri men usynystaryn qaraý boıynsha jumys júrgizedi.
"Ekinshi oqylymda Parlament palatalarynyń depýtattary men komıtetteri birlesken komısıaǵa jazbasha túrde engizgen eskertýler men usynystar ǵana talqylaýǵa jatady. Daýys berý qorytyndysy boıynsha Parlamenttiń árbir palata depýtattary jalpy sanynyń keminde úshten ekisiniń kópshilik daýsymen konstıtýsıalyq zańdy qabyldaıdy nemese ony qabyldamaıdy", – dedi komıtet tóraǵasy.
Túzetýlerdiń kelesi legi Konstıtýsıanyń 61-baby 2-tarmaǵynyń ekinshi bóligine sáıkes, Parlamentke engizilgen Úkimettiń zań jobalaryn dereý qaraýǵa qatysty.
Zań jobasy Parlament Májilisinde tirkelgen. Parlament palatalarynyń birlesken otyrysyn Májilis Tóraǵasy zań jobasy qabyldanǵan kúnnen keıingi kelesi jumys kúninen keshiktirmeı shaqyrady.
Birlesken otyrysta Úkimet ókili baıandama jasaıdy, odan keıin baıandamashyǵa suraqtar qoıylyp, depýtattarǵa sóz beriledi.
Qajet bolǵan jaǵdaıda zań jobasyn qaraý úshin depýtattarǵa óz usynystary men eskertýlerin engizýge múmkindik beretin Parlament palatalarynyń birlesken komısıasy qurylýy múmkin.
Onyń qorytyndylary boıynsha, zań jobasy Parlament palatalarynyń árqaısysynyń depýtattary jalpy sanynyń kópshilik daýsymen qabyldanady.
Daýys berý arqyly belgilengen daýys sany jınalmasa, zań jobasy qabyldanbady dep esepteledi.
"Parlamentte Premer-Mınıstrdiń esebin tyńdaý tártibin kórsetetin jeke taraý usynylyp otyr. Konstıtýsıanyń 67-babynyń tórtinshi tarmaqshasyna sáıkes, Premer-Mınıstr Parlamentke Úkimet qyzmetiniń negizgi baǵyttary jáne onyń barlyq mańyzdy sheshimderi týraly esep beredi. Bul esepti Parlament palatalarynyń birlesken otyrysynda tyńdaý usynylady. Bul rette depýtattar Premer-Mınıstrdiń esebin tyńdaý kezinde suraq qoıýǵa jáne jaryssózge qatysýǵa quqyly", –dep túsindirdi depýtat.