Qazaqstandyq oqýshylar Ál-Ferǵanı atyndaǵy fızıka páni boıynsha birinshi halyqaralyq olımpıadada 11 medal jeńip aldy, dep habarlaıdy almaty-akshamy.kz QazAqparatqa silteme jasap.
Ulttyq quramanyń qorjynynda 2 altyn, 6 kúmis jáne 3 qola medal bar. Olımpıada Ózbekstannyń Ferǵana qalasynda 8-13 qarasha aralyǵynda uıymdastyryldy. Zıatkerlik baıqaýǵa 18 elden, sonyń ishinde Reseı, Ázirbaıjan, Belarýs, Rýmynıa jáne taǵy basqa elderden 130-ǵa jýyq oqýshy qatysty. Ál-Ferǵanı atyndaǵy fızıka páni boıynsha halyqaralyq olımpıada eki kezeńde ótti. Birinshisi kezeńde — jazbasha jumystar, al ekinshisinde praktıkalyq jumystar qaraldy. Jeńimpazdardyń qatarynda, altyn medal — Álisher Erkebaev, Nurdáýlet Nazarbaı, kúmis medal — Danııl Shatohın, Orazhan Haıdar, Dinmuhammed Sapybek, Erdáýlet Nahyp, Bernar Shamgonov, Dıas Espan, qola medal ıegerleri — Beksultan Shárip, Asqar Qasymov, Nurjan Hasenov bar. Oqýshylar olımpıadadaǵy jeńisin Qazaqstan Táýelsizdiginiń 30 jyldyǵyna arnap otyr.
«Olımpıadadaǵy básekelestik óte joǵary boldy, óıtkeni qatysýshylardyń basym bóligi fızıka boıynsha halyqaralyq olımpıada (IPhO) reıtıńinde aldyńǵy qatarda. Bizdiń balalar tamasha nátıjeler kórsetip, Qazaqstandy álemdik arenada laıyqty kórsete bildi. Qazir bilim jáne ǵylym mınıstrliginiń «Daryn» ortalyǵy oqýshylarymyzdyń halyqaralyq olımpıadalarǵa qatysýyna jaǵdaı jasaý úshin ártúrli deńgeıdegi olımpıadalardy ótkizý boıynsha jumys istep jatyr», — dep atap ótti QR Bilim jáne ǵylym mınıstrligi Mektepke deıingi jáne orta bilim komıtetiniń tóraıymy Gúlmıra Kárimova.