Qazaqstan munaı óńdeýdi damytýdyń uzaqmerzimdi strategıasyn júzege asyrýda

Qazaqstanda munaı óńdeý kólemi turaqty ósip keledi: 2020 jyly 15,8 mln tonnadan 2024 jyly 17,9 mln tonnaǵa deıin artty. Bul ósim — Úkimettiń 2022–2023 jyldary júzege asyrǵan munaı ónimderin óndirý júıesin reformalaýdyń keshendi josparynyń nátıjesi. Reforma Atyraý, Pavlodar jáne Shymkent munaı óńdeý zaýyttaryn, sondaı-aq munaı ónimderin taratý jáne aınalym júıesin qamtydy.

Reforma aıasynda óndiristik prosesterge tolyq aýdıt júrgizildi, biryńǵaı tehnıkalyq qyzmet kórsetý júıesi qalpyna keltirildi, munaı óńdeýdiń biriktirilgen modeli engizildi, tıimsiz deldaldar joıyldy. Agroónerkásip keshenine janar-jaǵarmaıdyń basym jetkizilýi qamtamasyz etilip, otynnyń maqsatty bólinýine baqylaý kúsheıtildi, munaı ónimderin elden jáne EAEO aýmaǵynan tys jerge shyǵarýǵa shekteýler qoıyldy. Sondaı-aq kóterme jáne bólshek baǵalardy retteý sharalary qabyldandy. Osy qadamdar 2024 jyly ishki naryqty turaqtandyrýǵa múmkindik berdi: dızel otynynyń qory 268 myń tonnadan 612 myń tonnaǵa deıin eki ese artty. AI-92 jáne AI-95 benzınderiniń qory tıisinshe 404 jáne 85 myń tonnany qurady. Dızel men benzınsiz qalǵan janarmaı quıý beketteriniń sany 10 esege azaıdy. Qazirgi ýaqytta JJM qory jetkilikti deńgeıde.

Nátıjesinde, alǵash ret ishki naryq tolyq qamtamasyz etilgen jaǵdaıda AI-92 markaly joǵary sapaly benzınniń artyǵy eksporttala bastady.

Memleket basshysy elimizdiń ekonomıkasyn ártaraptandyrý jáne kómirsýtekterdi tereń óńdeýge basymdyq berý mindetin qoıdy. Bul baǵyt Qazaqstan úshin tek qajettilik emes, balamasy joq jolǵa aınaldy.