Oǵan pedagogıkalyq joǵary oqý oryndarynyń stýdentteri de qatysa alady.
Qazaqstan ustazdary onlaın kýrstarǵa qatysýǵa múmkindik aldy, dep habarlaıdy Almaty-akshamy.kz.
Bilim jáne ǵylym mınıstrliginiń baspasóz qyzmetiniń málimeti boıynsha, onlaın-kýrstar 2 tamyzda bastalyp, 31 qazanǵa deıin jalǵasady. Oǵan pedagogıkalyq joǵary oqý oryndarynyń stýdentteri de qatysa alady.
«Pandemıa jaǵdaıynda muǵalimderdiń róli, qoǵamdaǵy orny men eńbegi odan ári aıqyndala tústi. Sıfrlandyrý zamanynda muǵalimderdiń İT quzirettilikterin arttyrý qajet. Kýrs pedagogterdiń sıfrlyq daǵdylaryn jetildirýge baǵyttalǵan. Kýrs baǵdarlamasy Eýropalyq bilim qorymen birlesip ázirlendi. EBQ sarapshysy beınepedagogıka negizderi boıynsha sesıa ótkizip, beınematerıaldar jasaý boıynsha óz ádistemesimen bólisedi. Kýrs bilim jáne ǵylym mınıstrliginiń www.edu.kz platformasynda ornalastyrylady. Sondaı-aq Microsoft Kazakhstan, Bilim Media Group jáne Kundelik oqytý kýrsy aıasynda pedagogterge arnalǵan beınedárister ázirledi», – dedi QR BǴM «Órleý» biliktilikti arttyrý ulttyq ortalyǵynyń basqarma tóraıymy Ásel Muhametjanova.
Qazaqstandyq muǵalimder Fınlándıa men Ońtústik Koreıanyń bilim berý prosesine ınovasıalyq tehnologıalardy ıntegrasıalaý tájirıbesimen tanysady. Kýrstarda sıfrlyq bilim berý tehnologıalaryn paıdalana otyryp, pedagogterdi sabaqty jobalaý ádistemelerine úıretedi. Sondaı-aq pedagogter ActivStudio, Pictochart, Jamboard, Prezi, Flippity sandyq baǵdarlamalaryn kásibı túrde meńgerip, ulttyq bilim berý derekqorynyń resýrstaryn paıdalanýdy úırenedi.
Qazaqstannyń Bilim jáne ǵylym mınıstrligi qosymsha bilim berý pedagogteri úshin de kýrstar uıymdastyryp, qazirgi tańda 2000-ǵa jýyq pedagog biliktiligin arttyrdy. Olar úshin jetekshi ǵalymdardyń, oqytýshylardyń jáne praktık-pedagogterdiń arnaıy sheberlik saǵattary uıymdastyryldy.
«Kýrstyń árbir qatysýshysy óz tájirıbesin basqalardyń nátıjelerimen salystyrýǵa, óziniń atqarǵan jumysynyń baǵasyn bilýge, sondaı-aq áriptesteriniń, ǵalymdardyń, ádisker-praktıkterdiń keńesteri men usynymdaryn tyńdaýǵa múmkindik aldy. Biliktilikti arttyrý kýrstary pedagogterdi jetildirýge kómektesip, olardyń kásibı qarym-qatynas aıasyn keńeıtedi», – dep atap ótti QR BǴM respýblıkalyq qosymsha bilim berý oqý-ádistemelik ortalyǵynyń dırektory Raısa Sher.