QR Eńbek jáne halyqty áleýmettik qorǵaý vıse-mınıstri Asqarbek Ertaev Ulybrıtanıa jáne Soltústik Irlandıa Birikken Koróldiginiń Eńbektegi qanaý men zańnamany buzýǵa qarsy is-qımyl qyzmetiniń (GLAA) ókilderi Kolın Norton jáne Nevıll Bredberımen kezdesý ótkizdi. Kelissózder barysynda taraptar Ulybrıtanıaǵa maýsymdyq jumystarǵa baratyn Qazaqstan azamattarynyń quqyqtaryn qorǵaý salasyndaǵy yntymaqtastyq máselelerin, onyń ishinde QR ulttyq zańnamasyn eskere otyryp, qazaqstandyq azamattardy jeke jumyspen qamtý agenttikteri arqyly áketý úlgisin talqylady, dep habarlaıdy aqshamnews.kz.
Asqarbek Ertaev elden tys jerlerde jumys isteıtin Qazaqstan azamattarynyń quqyqtary men zańdy múddelerin qamtamasyz etý QR Eńbek jáne halyqty áleýmettik qorǵaý mınıstrligi (budan ári – Eńbekmıni) qyzmetiniń basym baǵyttarynyń biri bolyp tabylatynyn atap ótti.
«Ulybrıtanıanyń eńbekshilerdiń zańdy quqyqtary men múddelerin qamtamasyz etý salasyndaǵy tıimdi ózara is-qımyldy damytýǵa, atap aıtqanda, Eńbekmıni men GLAA arasyndaǵy yntymaqtastyq týraly memorandýmǵa qol qoıýǵa qosqan úlesin atap ótkim keledi.
Biz qazaqstandyqtardyń jumyspen qamtylýyna jáne olardyń qabyldaýshy memlekettiń eńbek naryǵyna tabysty ıntegrasıalanýyna qolaıly jaǵdaılar jasaý bizdiń elderimiz arasyndaǵy jaýapty jáne ózara tıimdi yntymaqtastyqtyń ajyramas bóligi bolyp tabylady dep sanaımyz», – dedi ol.
2023-2027 jyldarǵa arnalǵan QR Kóshi-qon saıasatynyń tujyrymdamasyn iske asyrý sheńberinde jeke jumyspen qamtý agenttikteriniń qyzmetin retteý tetikteri qaıta qaraldy – Qazaqstan azamattarynyń sheteldegi eńbek qyzmetin uıymdastyrý boıynsha olardyń eńbek mobıldiligi ortalyqtarymen ózara is-qımyl algorıtmi bekitildi jáne iske asyrylýda.
Óz kezeginde GLAA ókilderi sapar, vızaǵa ótinish berý týraly tolyq aqparat alý rásimi týraly, sondaı-aq qazaqstandyq azamattardyń Ulybrıtanıaǵa maýsymdyq jumystarǵa barýyn uıymdastyrý prosesindegi ózge de mańyzdy sátter týraly aıtyp berdi.
Kezdesý sońynda taraptar Ulybrıtanıada jumys isteýdi josparlap otyrǵan Qazaqstan azamattarynyń eńbek quqyqtary men múddelerin qorǵaý maqsatynda yntymaqtastyq pen ózara is-qımyldy odan ári damytý týraly ýaǵdalasty.
Esterińizge sala keteıik, osy jyldyń 11 aqpanynda Londonda ótken «Qazaqstan – Ulybrıtanıa» Strategıalyq dıalogy aıasynda Eńbekmıni men GLAA arasynda yntymaqtastyq týraly memorandýmǵa qol qoıyldy. Qujat taraptardyń eńbek kóshi-qony salasyndaǵy ózara is-qımylyn kózdeıdi.