Kólik vıse-mınıstri Sátjan Ablalıev Parlament Senatynda Qazaqstan Respýblıkasy men Túrkıa Respýblıkasynyń úkimetteri arasyndaǵy júkterdi halyqaralyq qurama tasymaldaý týraly kelisimdi ratıfıkasıalaý týraly Zań jobasyn usyndy.
Zań jobasy ártúrli kólik túrin paıdalana otyryp, júk tasymaldaryn jeńildetýge jáne Qazaqstan men Túrkıa arasyndaǵy saýda-ekonomıkalyq yntymaqtastyqty damytýǵa baǵyttalǵan. Kelisimdi ratıfıkasıalaý eki el arasynda avtomobıl, temirjol jáne sý kóligimen oryndalatyn júkterdi tasymaldaý kólemin ulǵaıtýǵa múmkindik beredi, dep habarlaıdy Almaty-akshamy.kz QR Kólik mınıstrligine silteme jasap.
Kólik mınıstriniń orynbasarynyń aıtýynsha, atalǵan qujat Kaspıı teńizinde turaqty temirjol-paromdyq operasıalardy, memleketterdi qosatyn temirjol jelilerinde, atap aıtqanda halyqaralyq konteınerlik blok-poezdar úshin tıisti baılanystar men tranzıttik qyzmetter kórsetýdi kózdeıdi, sondaı-aq kedendik resimdeý erejelerin eskere otyryp, eki el arasynda júkterdi tasymaldaý sharttaryn aıqyndaıdy.
«Qazirgi ýaqytta biz aralas Transkaspıı halyqaralyq kólik baǵyty arqyly Qytaıdan Eýropaǵa júkterdi jetkizý merzimderin qysqartý boıynsha jumys júrgizip jatyrmyz. Oǵan temirjol, avtomobıl jáne sý kóligi qatysady. Qazirdiń ózinde marshrýt boıynsha júkterdi ótkizý jáne taýarlardy jetkizý merzimi 19-23 kúnge deıin qysqartyldy, onyń ishinde 6 kún - Qazaqstan aýmaǵy boıynsha. Bul ótken jylmen salystyrǵanda 2 ese jyldam. Bul kelisim Transkaspıı halyqaralyq kólik baǵytynyń damýyna áser etedi», – dedi S.Ablalıev.
Ol kelisimdi oryndaý barysyndaǵy máselelerdi retteý úshin tasymaldaýdy damytý jónindegi birlesken komıtet qurylatynyn aıtty. Onyń basty mindeti tranzıttik tasymaldardyń jyldamdyǵy men sapasyn arttyrý bolady.
Kólik mınıstrliginiń málimetinshe, kelisimdi ratıfıkasıalaý boıynsha jumystar qazirgi ýaqytta Túrkıa elinde de júrgizilip jatyr.