Elimiz táýelsizdik alǵaly Qazaqstan men Qytaı arasyndaǵy saýda-sattyq 60 esege artty
1992 jyly ózara alys-beristi 368 mln dollardan bastaǵan taraptardyń byltyrǵy jyl qorytyndysy boıynsha taýaraınalym kólemi 23 mlrd dollarǵa jýyqtaǵan. Mundaı derekter 2022 jyldyń alǵashqy kúnderi jarıalanǵan elimizdegi Qytaıdyń tótenshe jáne ókiletti elshisi Chjan Sáonyń «Qytaı-Qazaqstan dostyǵy – eki halyqtyń baǵa jetpes baılyǵy» atty maqalasynda keltirilgen, dep habarlaıdy Almaty-akshamy.kz
Sondaı-aq onda aspanasty eli bizdiń ekonomıkamyzǵa 2020 jyldyń sońyna deıin eseptegenniń ózinde 21 mlrd dollardan astam ınvestısıa quıǵany aıtylǵan. Bul qarjy óndiris, aýyl sharýashylyǵy, energetıka, kólik salalary jáne «jasyl» ekonomıka baǵytyndaǵy jobalardy qoldaýǵa jumsalǵan. Qos el arasynda 5 transshekaralyq munaı-gaz qubyry, eki shekaralyq temirjol jelisi qurylǵan. Qazaqstan Qytaı arqyly Tynyq muhıtqa jol ashty. Eki memleket te Azıa men Eýropany baılanystyrýshy mańyzdy torapqa aınaldy. Tıimdi áriptestiktiń aıasynda halyqaralyq alańda elderimizdiń bedeli asyp, jańa naryqtar baǵyndyrylyp jatyr.
«Dollarlyq mánde eksport pen ımport kólemi 6 trln 50 mlrd-ty qurady. 2013 jyly bul kórsetkish alǵash ret 4 trln dollarǵa jetse, 8 jyldan keıin bir jyldyń ishinde eki ret jańa tarıhı bıikke shyqty», - dedi QHR Bas keden basqarmasy Statısıka jáne taldaý departamentiniń dırektory Lı Kýıven.
«Álemde órship jatqan pandemıa jaǵdaıynda Qytaıdyń syrtqy saýdasy sandyq, sapalyq jaǵynan jaqsarýyn jalǵastyrdy. 13 jyl qatarynan Qytaı – álemdegi eń iri eksporttaýshy. Sondaı-aq biz kútken nátıjelerden áldeqaıda asyp tústi, 14-shi besjyldyqtyń jaqsy bastaýy bolatyn kórsetkishterge qol jetkizdik», - dedi QHR Memlekettik aqparat ortalyǵy boljaý bóliminiń Makroekonomıkalyq zertteýler zerthanasynyń dırektory Ian Mın.