Eki taraptyń memleket jáne úkimet basshylary kelissózderiniń nátıjesinde boı kóteretin shekaraaralyq saýda ortalyǵyna «Alataý» aty beriledi.
QR Saýda jáne ıntegrasıa vıse-mınıstri Qaırat Tórebaevtyń Bishkekke jumys sapary barysynda osy jáne basqa da elaralyq máseleler sóz boldy, dep habarlaıdy Almaty-akshamy.kz atalǵan mınıstrliktiń baspasóz qyzmetine silteme jasap.
Qaırat Tórebaevtyń Qyrǵyz Respýblıkasynyń ınvestısıalar mınıstriniń orynbasary Nýradıl Baıasovpen ekijaqty kezdesýinde taraptar Qazaqstan Respýblıkasy men Qyrǵyz Respýblıkasy arasyndaǵy saýda-ekonomıkalyq yntymaqtastyqtyń qazirgi jaǵdaıyn talqylady.
Qazaqstandyq ınvestorlar úshin qolaıly jaǵdaılar jasaý máseleleri talqylandy, qazaqstandyq kompanıalardyń fıskaldyq daýlaryn sheshýge kómek surady.
Kezdesýdiń negizgi taqyryptarynyń biri Qyrǵyz Respýblıkasy aýmaǵynda I aımaqaralyq yntymaqtastyq forýmyna daıyndyqty talqylaý boldy. Taraptardyń pikirinshe, forým eki el arasyndaǵy saýda-ekonomıkalyq yntymaqtastyqty damytýǵa qosymsha serpin beredi.
Eki jaqty yntymaqtastyqty jáne ekonomıkalyq ıntegrasıany tereńdetý máselelerin Qaırat Tórebaev Qyrǵyz Respýblıkasy Ekonomıka jáne qarjy mınıstriniń orynbasary Mırlanbek Baıgonchokovpen de talqylady. Taraptar memleket basshylarynyń ózara saparlarynyń jáne Úkimetaralyq keńestiń 9-shy otyrysynyń qorytyndylary boıynsha qol jetkizilgen ýaǵdalastyqtardyń iske asyrylý barysyn talqylady.
Atap aıtqanda, «Alataý» jobasy ataýymen shekaraaralyq saýda ortalyǵyn qurý prosesi. Jobany Saýda jáne ıntegrasıa mınıstri B.Sultanov PA-nyń 9-shy otyrysy aıasynda tanystyrdy. Qazaqstandyq tarap KTT-ny qoldanystaǵy «Qarasý - Aqtilek» ótkizý pýnktteriniń aımaǵynda ornalastyrýdy usyndy.
Kezdesý nátıjesinde ortalyq tujyrymdamasynyń jobasyn jedeldetip maquldaý týraly kelisimge qol jetkizildi. Ózara saýda kólemin ulǵaıtý maqsatynda qazaqstandyq tarap mashına jasaý, metalýrgıa, tamaq ónerkásibi, qurylys materıaldary men hımıa ónimderi sıaqty salalardaǵy eksporttyń aýqymyn keńeıtýge daıyn ekendigin málimdedi. Barlyǵy 113,4 mıllıon AQSH dollaryn quraıtyn 50 ónim pozısıalar bar.
Sondaı-aq munaı jáne munaı ónimderi saýdasy týraly kelisimderdiń jobalary men jekelegen taýar túrlerimen saýda týraly kelisim boıynsha kelissózderdi kúsheıtý usynyldy. Taraptar biryńǵaı standarttardy engizý jáne biryńǵaı eýrazıalyq taýarlardy taratý júıesi sheńberinde eki eldiń taýarlardy taratý jelileri arasyndaǵy ózara is-qımyldy qamtamasyz etý jónindegi sharalardy júzege asyrýdy talqylady. Qazaqstan tarapynyń Qyrǵyzstan aýmaǵynda Shý (3 KSO - qoıma) jáne Ystyqkól oblystarynda (1 KSO - satý aldyndaǵy daıyndyq/aldyn ala tazartý) 3 KSO salýǵa qyzyǵýshylyǵy rastaldy.