Qazaqstan Respýblıkasynyń Ǵylym jáne joǵary bilim mınıstri Saıasat Nurbek pen Qyrǵyz Respýblıkasynyń Ǵylym, joǵary bilim jáne ınovasıalar mınıstri Baktıar Orozov Ál-Farabı atyndaǵy Qazaq ulttyq ýnıversıtetiniń Bishkek qalasyndaǵy fılıalyna bardy.
Kezdesýge QazUÝ-dyń Basqarma múshesi – ǵylymı-ınnovasıalyq qyzmet jónindegi prorektory Marǵulan Ibraıymov, Qyrǵyz Respýblıkasynyń Ǵylym, joǵary bilim jáne ınovasıalar mınıstriniń orynbasary Nurlan Omýrov, sondaı-aq QazUÝ fılıalynyń dırektory Jamın Sheıshenov qatysty.
Mınıstrler ýnıversıtet fılıalynyń oqý jáne ǵylymı qyzmetimen tanysyp, oqý aýdıtorıalaryn aralady. QazUÝ-dyń Ǵylymı-ınnovasıalyq qyzmet jónindegi prorektory Marǵulan Ibraıymov pen fılıal dırektory Jamın Sheıshenov oqý ornynyń qurylýy, qazirgi qyzmeti men damý perspektıvalary jóninde tanystyrdy.
QazUÝ-dyń Bishkek qalasyndaǵy fılıaly 2022 jylǵy 26 mamyrda ashyldy. Onyń resmı ashylý rásimi Qazaqstan Respýblıkasynyń Prezıdenti Qasym-Jomart Toqaev pen Qyrǵyz Respýblıkasynyń Prezıdenti Sadyr Japarov qatysýymen ótken bolatyn. Kezdesý barysynda mınıstrler tarapynan naqty usynystar aıtylyp, bolashaqta júzege asyrylýy múmkin bastamalar qozǵaldy. Mınıstr Saıasat Nurbek óz sózinde atalmysh fılıaldyń Qazaqstan men Qyrǵyzstan arasyndaǵy strategıalyq áriptestiktiń naqty nátıjesi ekenin atap ótti. «Eki eldiń jastaryn sapaly bilimmen qamtamasyz etip, ǵylymı áleýetin arttyrý jolyndaǵy ortaq kúsh-jigerimiz bolashaqta úlken jetistikterge jetkizedi», – dedi mınıstr.
Búgingi tańda fılıalda 12 bakalavrıat baǵdarlamasy jáne beıindik magıstratýra boıynsha bilim beriledi. Eń kóp suranysqa ıe mamandyqtar qatarynda – «Quqyqtaný», «Menedjment», «Kompúterlik ınjenerıa» jáne «Shetel fılologıasy» bar. Qazirgi ýaqytta fılıalda 750-ge jýyq stýdent oqıdy, al 2025–2026 oqý jylyna 630-dan astam talapker qabyldanǵan. Dárister qazaq, orys jáne aǵylshyn tilderinde júrgiziledi.
Sondaı-aq sapar aıasynda bilim mınıstrleri QazUÝ fılıalynyń oqytýshy-professorlar quramy jáne stýdentterimen júzdesti.
Jıylǵandar ózara pikir almasýǵa belsendi atsalysyp, kókeıdegi suraqtaryna jaýap aldy. Stýdentter oqýdy tamamdaǵan soń jumysqa ornalasý múmkindikteri men qosymsha bilim jetildirý joldaryna qyzyǵýshylyq tanytty. Qyrǵyz Respýblıkasynyń mınıstri Baqtıar Orozov óz tarapynan: «Bizdiń túlekterimizdiń eńbek naryǵynda básekege qabiletti bolýy mańyzdy. Biz qazirgi zamanǵy talaptarǵa sáıkes keletin jańa bilim berý standarttaryn engizý boıynsha jumys istep jatyrmyz», – dep pikir bildirdi.
Sonymen qatar basqosý barysynda akademıalyq almasý, birlesken ǵylymı jobalardy iske asyrý jáne bilim berý salasyndaǵy yntymaqtastyqty keńeıtý máseleleri keńinen talqylandy.
Fılıal jumysymen tanysý eki el arasyndaǵy bilim berý baılanystaryn nyǵaıtýǵa baǵyttalǵan mańyzdy qadam boldy.
Aıta ketsek, búginde QazUÝ-dyń sheteldegi fılıaldary Túrkıanyń Ystambul qalasynda jáne Reseıdiń Omby qalasynda da tabysty jumys istep keledi.