Jahandyq ekologıalyq problemalarynyń biri.
Qazaqstan Parlamenti Senatynyń spıkeri Máýlen Áshimbaev Ózbekstan Olıı Májilisi Senatynyń Tóraǵasy Tanzıla Narbaevamen birge eki el parlamentteri palatalary arasyndaǵy yntymaqtastyq jónindegi komısıanyń úshinshi otyrysyna qatysty, dep habarlaıdy Almaty-akshamy.kz QazAqparatqa silteme jasap.
Komısıanyń jumysyn asha otyryp, Máýlen Áshimbaev qazirgi kezeńde Qazaqstan men Ózbekstan arasyndaǵy syndarly jáne senimdi dıalog qurǵanyn atap ótti.
«Búginde bizdiń kóshbasshylarymyz yntymaqtastyq pen ózara is-qımyldyń úlgisin kórsetip otyr. Qazaqstan Prezıdenti Qasym-Jomart Toqaev Memleket basshysy retindegi alǵashqy saparyn baýyrlas Ózbekstanǵa jasady. Sonymen qatar, Ózbekstan Respýblıkasynyń Prezıdenti Shavkat Mırzıeevtiń 2021 jylǵy jeltoqsandaǵy Memlekettik saparynyń qorytyndysy boıynsha bizdiń áriptestigimiz odaqtas qatynas deńgeıine kóterildi. Bizdiń Palatalar arasyndaǵy yntymaqtastyq jónindegi komısıa belsendi jumys istep jatyr. Komısıanyń eki teń tóraǵasynyń belsendi jumysyn atap ótkim keledi», - dedi Máýlen Áshimbaev.
Senatorlardyń talqylaıtyn negizgi máselelerdiń biri - Aral teńizi apatynyń saldaryn joıý boıynsha ózara is-qımyl perspektıvalary.
«Araldyń qurǵaýyn BUU jáne búkil álemdik qoǵamdastyq qazirgi zamannyń jahandyq ekologıalyq problemalarynyń biri dep tanydy. Qazaqstan men Ózbekstan Aral óńirindegi jaǵdaıdy edáýir dárejede turaqtandyrýǵa múmkindik beretin tıisti sharalardy jáne jobalardy iske asyryp jatyr. Búgin komısıa otyrysynda bizdiń depýtat áriptesterimiz osy ótkir ekologıalyq problemany sheshý úshin parlamentter tarapynan birlesken jumys boıynsha odan ári usynystar men ıdeıalar kóteretinine senimdimin», - dedi Máýlen Áshimbaev.
Sondaı-aq, otyrys barysynda senatorlar óńiraralyq jáne shekara mańy yntymaqtastyǵyn damytý, sondaı-aq eki el qalalarynyń baılanysyn nyǵaıtý máselelerin talqylady.