QR Aýyl sharýashylyǵy mınıstri Aıdarbek Saparov Ózbekstan Respýblıkasy aýyl sharýashylyǵy mınıstri Ibrohım Abdýrahmonovpen kezdesý ótkizdi.
Aıdarbek Saparov agroónerkásiptik keshen salasyndaǵy ózara is-qımyl Qazaqstan men Ózbekstan yntymaqtastyǵynyń basym baǵyttarynyń biri bolyp tabylatynyn atap ótti, dep habarlaıdy aqshamnews.kz
2023 jyly AÓK ónimi boıynsha taýar aınalymy 1,7 mlrd AQSH dollaryn qurady, 2023 jyly Ózbekstanǵa 1,51 mlrd AQSH dollaryna ónim eksporttaldy. 2024 jylǵy qańtar-maýsymda taýar aınalymy 758 mln.AQSH dollaryn, eksport - 635,7 mln. AQSH dollaryn qurady.
"Ózbekstan-bizdiń negizgi saýda seriktesimiz jáne sizdermen ósimdik sharýashylyǵy men mal sharýashylyǵynda yntymaqtastyqty nyǵaıtýǵa, ónim eksportyn keńeıtýge múddelimiz.
Aǵymdaǵy jyly biz 23 mln gektardan astam alqap egip, dándi daqyldardyń jaqsy ónimin kútemiz. Budan basqa, azyq-túlik korporasıasynyń resýrstarynda 1 mln.tonnadan astam astyq bar jáne jetkizýge daıyn.
Et ónimderin jetkizýdi ulǵaıtý boıynsha sharalar qabyldanýda. Búginde eksporttaýshy kásiporyndardyń tiziliminde mal sharýashylyǵy ónimderin óndiretin 80 qazaqstandyq kásiporyn bar, olardyń 14-i aǵymdaǵy jyly engizilgen, 130-dan astam kásiporyn engizýdi kútýde", - dep atap ótti Aıdarbek Saparov.
Jol kartasy sheńberinde ınvestısıalyq kelisimder men saýda kelisimsharttaryn iske asyrý boıynsha birlesken jumys júrgizilýde.
Atap aıtqanda, halyqaralyq ónerkásiptik kooperasıa ortalyǵynyń aýmaǵynda astyqty tereń óńdeý jáne ósimdik maıyn tazartý boıynsha eki jobany iske asyrý josparlanýda. Túrkistan oblysynda qýattylyǵy táýligine 1500 tonna bolatyn 10 myń bas iri qara mal bordaqylaý alańy men et óńdeý kesheni salynýda.
Pysyqtaý satysynda - Túrkistan oblysynyń Jibek sharýashylyǵy salasyn damytý, QR aýmaǵynda dándi jáne jemshóp daqyldaryn birlesip ósirý jónindegi jobalar.
Qazaqstandyq tarap úshin Ózbekstannyń bylǵary shıkizatyn óńdeý tájirıbesi erekshe qyzyǵýshylyq týdyrady.
"Qazaqstanda terini bastapqy óńdeý boıynsha 9 kásiporyn jumys isteıdi. Olardyń qýattylyǵy 3,3 mln. danaǵa deıin iri qara terisin jáne 4 mln. danadan astam usaq mal terisin óńdeýge múmkindik beredi. Alaıda, óndirister tek 20-30% júktelgen. Terini qaıta óńdeý jobalaryn qurýdy qoldaýǵa daıynbyz?
Sonymen qatar, Qazaqstan men Ózbekstannyń ǵylymı-zertteý ınstıtýttaryn tarta otyryp, maqta ósirý baǵyty boıynsha yntymaqtastyq biz úshin perspektıvaly bolyp tabylady", - dedi Aıdarbek Saparov.
Aıta keteıik, elimizde maqta sharýashylyǵyn damytý boıynsha jumystar júrgizilýde. Aǵymdaǵy jyly shıtti maqtanyń sapasyn jaqsartý maqsatynda Ózbekstannan 1500 tonnaǵa jýyq joǵary reprodýksıaly tuqym ımporttaldy.
Toqyma, tigin ónerkásibin damytý úshin Ózbek ınvestorlarymen birlesip Maqtaaral aýdanynda quny 21 mlrd.teńge bolatyn maqta-toqyma kesheni men logıstıkalyq hab qurý josparlanýda. Jobanyń qýattylyǵy 160 myń tonnany quraıdy. Joba 2026 jyldan 2027 jylǵa deıin tolyq sıklde iske qosylady.
"Biz yntymaqtastyqty nyǵaıtý jáne aýyl sharýashylyǵyn birlesip damytý boıynsha barlyq usynystardy qoldaımyz. Bul úshin kóptegen múmkindikter bar, úlken áleýet bar jáne ony barynsha paıdalaný qajet. Jol kartasynyń barlyq tarmaqtary Sizdiń qoldaýyńyzdyń arqasynda oryndaldy, birneshe baǵyt boıynsha jaqsy nátıjeler bar. Kúnbaǵys pen terini óńdeý máselelerindegi yntymaqtastyqty qarastyrýǵa daıynbyz", - dedi Ibrohım Abdýrahmonov.
Kezdesý sońynda mınıstrler Qazaqstanda dándi jáne maıly daqyldardy ósirý boıynsha yntymaqtastyq týraly Memorandýmǵa qol qoıdy.