Qazaqstan men Eýropalyq Odaq sırek kezdesetin jer elementterin óndirip, osy salada yntymaqty kúsheıtpek.
Jaqynda Mysyrda Úkimet basshysy Álıhan Smaıylov pen Eýropalyq komısıa tóraǵasy Ýrsýla Fon der Láıen turaqty shıkizat, batareıalar jáne «jasyl» sýtegi quny tizbegi salasyndaǵy strategıalyq áriptestik týraly memorandýmǵa qol qoıǵan bolatyn. Osy kelisimdi júzege asyrý úshin qos tarap jol kartasyn ázirlemek, dep habarlaıdy Almaty-akshamy.kz.
Elimizdiń Indýstrıa jáne ınfraqurylymdyq damý vıse-mınıstri Marat Qarabaev Brússelde Eýropalyq Odaq ókilderimen kezdesti. Taraptar geologıalyq barlaýǵa birlesip qarajat tartý, jańa óndiris oryndaryn qurý, kómirtegi qaldyqtaryn azaıtý jáne ken oryndaryn sıflandyrý máselelerin talqylady.
«Jasyl tehnologıaǵa kóship, sıfrlandyrýdy damytý úshin biz úsh nársege basymdyq bermekpiz. Ol - shıkizat, jasyl sýtegi jáne batareıalar. Osyǵan qajetti shıkizat materıaldaryn jer astynan izdeý, qaıta óńdeý, ıaǵnı barlyq kezeń boıynsha iskerlikti arttyrýǵa nıettimiz», - deıdi Eýropalyq komısıanyń shıkizat bóliminiń jetekshisi Pıter Hendlı.
«Birinshiden, Eýropadan ınvestısıa tartý, ekinshiden, tehnologıa tartý. Al eń basty alǵa qoıyp otyrǵan maqsatymyz - tek qana Eýropaǵa shıkizat jiberemiz emes, sol tolyqqandy óndiristi el aýmaǵynda qoıyp, osy Eýropa elderine bolsyn, kásiporyndaryna bolsyn daıyn taýardy jiberý», - deıdi QR Indýstrıa jáne ınfraqurylymdyq damý vıse-mınıstri Marat Qarabaev.