Qazaqstan men Belarýstiń birikken barlaý bólimsheleri torýyl uıymdastyrý, qajetti aqparatty alý jáne qupıa qujattardy alyp, topty turaqty ornalasý pýnktine evakýasıalaý maqsatymen taýdan asty.
Jaýyngerlik tapsyrmany oryndaý kezinde «Baýyrlastyq shyńy-2024» oqý-jattyǵýyna qatysýshylar bólimshelerdiń úılesimdiligi men ártúrli dárejedegi komandırlerdiń sheshim qabyldaý qabileti baǵalandy, dep habarlaıdy almaty-akshamy.kz Qorǵanys mınıstrligine silteme jasap.
Baǵynyshtylardyń is-áreketin Qazaqstan Desanttyq-shabýyldaý áskerleriniń qolbasshysy general-maıor Almaz Jumakeev pen shtab bastyǵy – Belarýs Qarýly kúshteri Arnaıy operasıalar kúshteri qolbasshysynyń birinshi orynbasary polkovnık Aleksandr Ilúkevıch qadaǵalady.
– Taýly-shóldi jerlerde ekijaqty taktıkalyq-arnaıy oqý-jattyǵýdyń praktıkalyq bóligi aıaqtaldy. Komandalyq quramnyń deńgeıi óte joǵary boldy. Muny birtutas organızm retinde áreket etken eki eldiń bólimsheleriniń úılesimdiligi dep baǵalaýǵa bolady. Birikken jasaqtardyń áskerı qyzmetshileri dene daıyndyǵy men ózara is-qımyldyń joǵary deńgeıin kórsetti, – dep qorytyndylady oqý-jattyǵýdyń jetekshisi general-maıor Almaz Jumakeev.
Belarýs Qarýly kúshteri Arnaıy operasıalar kúshteriniń nusqaýshylary qazaqstandyq desantshylarmen óz tájirıbelerin bólisti. Arnaıy jasaqtar jaýmen tikeleı qaqtyǵys jaǵdaıynda taktıkalyq medısına boıynsha sabaqtar ótkizdi.
Qazaqstan Desanttyq-shabýyldaý áskerleriniń qolbasshysy atap ótkendeı, birikken kontıngent aldyna qoıylǵan barlyq mindetterdi tolyq kólemde oryndady. Eki el arasynda osyndaı oqý-jattyǵýlardy jyl saıyn ótkizý josparlanýda. Alda qarýly kúrestiń jańa tásilderi men quraldarynyń paıda bolýyn eskere otyryp, ózgerister engizilip, mindetter kúrdelene túspek. Jeke quramnyń bilimi, daǵdylary men tájirıbesi artady.
Esterińizge sala keteıik, «Baýyrlastyq shyńy-2024» eki jaqty taktıkalyq-arnaıy oqý-jattyǵýy 15-20 shilde aralyǵynda Jetisý oblysyndaǵy «Kóktal» oqý polıgonynda ótkizildi. Oǵan Qazaqstan Qarýly kúshteri Desanttyq-shabýyldaý áskerleriniń jáne Belarýs Qarýly kúshteri Arnaıy operasıalar kúshteriniń 350-den astam áskerı qyzmetshisi qatysty.
Oqý-jattyǵýlardyń saltanaty jabylý rásiminde manevrler barysynda erekshelengen eki eldiń áskerı qyzmetshileri basshylyq tarapynan gramotalarmen jáne baǵaly syılyqtarmen marapattaldy.