Memleket basshysynyń Ázirbaıjanǵa memlekettik sapary barysynda QR Ǵylym jáne joǵary bilim mınıstri Saıasat Nurbek pen Ázirbaıjan Respýblıkasynyń Ǵylym jáne bilim mınıstri Emın Eldar oglý Amrýllaevtyń, sondaı-aq ADA University ókilderiniń kezdesýi ótti.
Saıasat Nurbek pen Emın Eldar oglý Amrýllaev arasynda 2017 jylǵy 3 sáýirdegi Ázirbaıjan Respýblıkasynyń Bilim mınıstrligi men Qazaqstan Respýblıkasynyń Bilim jáne ǵylym mınıstrligi arasyndaǵy Bilim salasyndaǵy yntymaqtastyq týraly kelisimge ózgerister engizý týraly hattamaǵa qol qoıyldy, dep habarlaıdy Almaty-akshamy.kz.
Qol qoıý sheńberinde doktorantýraǵa kvotalar sany artýda. Taraptar jyl saıyn bakalavrıat, magıstratýra, doktorantýra baǵdarlamalary, úzdiksiz ıntegrasıalanǵan medısınalyq bilim berý jáne rezıdentýra baǵdarlamasy boıynsha bilim alýshylarmen balamaly almasýdy júzege asyrady.
Vedomstvo basshylary eki dostas eldiń joǵary bilimi men ǵylymyn damytý baǵytynda tyǵyz yntymaqtastyqtyń odan ári múmkindikterin talqylady.
Osy oraıda «Qonayev Academic Campus Fund» men «ADA University» arasynda ózara kelisim týraly memorandýmǵa qol qoıyldy.
«Qazaqstan men Ázirbaıjannyń baı tarıhy men ǵasyrlardy qamtıtyn tereń baılanystary bar. Ekijaqty qarym-qatynastyń mańyzy bizdiń shekaramyzdan asyp túsedi jáne bilim, ǵylym jáne ınovasıany qosa alǵanda, ártúrli sektorlarda yntymaqtastyq úshin úlken áleýetke ıe. Bizdiń akademıalyq ınstıtýttar arasyndaǵy sınergıany nyǵaıtý úshin osy áleýetti paıdalaný óte mańyzdy. Osy turǵyda bizdiń kezdesýimiz atalmysh bastamadaǵy mańyzdy qadamdy ańǵartady. Biz akademıalyq yntymaqtastyqty keńeıtýge jáne tájirıbe almasýǵa negiz salýdamyz. «Qonayev Academic Campus» jáne «ADA University» arasyndaǵy seriktestik ınovasıalardyń katalızatory bola alady, ekonomıkalyq damýdy yntalandyrady jáne bizdiń óńirde, odan tys jerlerde kóshbasshylardyń kelesi býynynyń múmkindikterin keńeıte alady», - dep atap ótti S.Nurbek.
Sonymen qatar, mınıstr ADA University-de oqıtyn qazaqstandyq stýdenttermen kezdesý ótkizip, Ázirbaıjan ýnıversıtetiniń kampýsyn aralady.
Aıta keteıik, ADA University Times Higher Education – Impact Rankings: Quality Education 2023 reıtıńiniń top – 200-ge kiredi. Ýnıversıtet AQSH-tyń «Anthology» bilim berý-zertteý ortalyǵymen sıfrlyq oqytý jáne bilim berý salasyndaǵy óńirlik kóshbasshy retinde sertıfıkattalǵan.