Qazaqstan men Ázirbaıjan Respýblıkasy birqatar veterınarıalyq sertıfıkattar boıynsha kelisimge qol jetkizdi, dep habarlaıdy aqshamnews.kz Aýyl sharýashylyǵy mınıstrligine silteme jasap.
Bul eki el arasyndaǵy saýda qarym-qatynastaryn damytýda mańyzdy qadam bolmaq. Bul bastama mınıstrliktiń agrarlyq sektordy damytý jáne Qazaqstannyń álemdik arenadaǵy ustanymyn nyǵaıtý jónindegi strategıasynyń bir bóligi bolyp sanalady.
QR Aýyl sharýashylyǵy mınıstrligi júıeli negizde mal sharýashylyǵy ónimderiniń sapasy men qaýipsizdigi standarttaryn jaqsartý, óndirýshilerdiń jańa halyqaralyq naryqtarǵa shyǵýyna qoldaý kórsetý boıynsha sharalar qabyldaýda. Vedomstvo kelissózderde negizgi ról atqardy.
Endi otandyq óndirýshiler iri jáne usaq maldan alǵan sút pen sút ónimderin Ázirbaıjanǵa eksporttaı alady. Sondaı-aq qus etin, ishki ónimder men janama ónimderdi jetkizý týraly kelisimge qol jetkizildi. Túıelerdi jáne túıe tuqymdasynyń basqa da túrlerin, atap aıtqanda lama, alpaka jáne vıkýná, asyl tuqymdy iri qara, usaq mal, soıýǵa arnalǵan iri jáne usaq mal, konserviler, shujyq jáne basqa da daıyn et ónimderin eksporttaý úshin veterınarıalyq sertıfıkatqa qol qoıý kelisildi.
«Qol jetkizilgen kelisim qazaqstandyq eksportty keńeıtý jáne eki el arasyndaǵy mal sharýashylyǵy salasyndaǵy ekonomıkalyq seriktestikti nyǵaıtý úshin jańa múmkindikter ashady. Bul ekonomıkalyq ósim men órkendeýge septigin tıgizetinine senimdimin», - dep Aýyl sharýashylyǵy mınıstri Aıdarbek Saparov kelisimniń mańyzdylyǵyna toqtaldy.
Eksportqa shyǵarylatyn ónim túrlerin keńeıtý jumystary jalǵasýda.