Qasym-Jomart Toqaev shaqyrýyn qabyl alyp, Astanaǵa resmı saparmen kelgeni úshin Ilham Álıevke alǵys aıtty, dep habarlaıdy Almaty-akshamy.kz Aqordaǵa silteme jasap.
«Byltyr tamyz aıynda men Bakýge saparmen bardym. Bul saparym asa nátıjeli boldy jáne ekijaqty qatynastarǵa tyń serpin berdi. Qazir prezıdentterdiń eki el úkimetine bergen tapsyrmalarynyń oryndalý barysyn pysyqtaý qajettiligi týdy. Ázirbaıjan men Qazaqstan – baýyrlas ári dostas memleketter. Bizdiń tarapymyzdan saýda-ekonomıka jáne ınvestısıa salalaryndaǵy jan-jaqty yntymaqtastyqty, sondaı-aq ekijaqty formattaǵy jáne halyqaralyq uıymdar aıasyndaǵy saıası qarym-qatynasty damytý úshin barlyq múmkindik jasalyp jatyr. Biz Kavkaz aımaǵynda jetekshi ról atqaratyn Ázirbaıjan memleketimen ekonomıkalyq qatynastar men yntymaqtastyqty damytý úshin aýqymdy jumys júrgizýdi kózdep otyrmyz. Bizdiń aramyzda eshqandaı másele joq. Tek qana osy baǵytta alǵa ilgerileýge degen nıet qana bar», – dedi Qasym-Jomart Toqaev.
Memleket basshysy Ázirbaıjan prezıdentimen birlesip Geıdar Álıev atyndaǵy kósheni ashatynyn atap ótti.
"Búgin Geıdar Álıevke arnalǵan «Ǵazız ǵumyr» derekti fılminiń tusaýkeseri ótedi. Ony bizdiń tapsyrmamyz boıynsha Qazaqstan teleradıokorporasıasy túsirdi. Elderimiz arasyndaǵy baýyrlastyqtyń kórsetkishi qazaq halqynyń atynan Fızýlı qalasynda salynyp jatqan balalar shyǵarmashylyǵyna arnalǵan ortalyq bolyp otyr. Maǵan nysannyń qurylysy qarqyndy salynyp jatqanyn aıtty", - dedi Toqaev.
Óz kezeginde Ázirbaıjan Prezıdenti Ilham Álıev Memleket basshysyna alǵysyn jetkizdi.
«Qurmetti Qasym-Jomart Kemeluly, eń aldymen, arnaıy shaqyrǵanyńyzǵa jáne qonaqjaılyǵyńyzǵa alǵys aıtamyn! Geıdar Álıevke kórsetken qurmetińiz úshin búkil Ázirbaıjan halqynyń jáne jeke óz atymnan rızashylyǵymdy bildirgim keledi. Jalpy, biz barsha Qazaqstan halqynyń elimizge degen ystyq yqylasyn árqashan sezinip kelemiz. Ázirbaıjanǵa resmı saparyńyz barysynda osyndaı tileýlestikti Siz de baıqadyńyz dep oılaımyn. Bizdiń resmı saparlar aıasynda jıi kezdesýimiz osy qarym-qatynasymyzdyń sıpatyn ańǵartady jáne udaıy baılanysta bolý qajet ekenin kórsetedi. Ózińiz aıtqandaı, bizdiń elderimizdiń bir-birine degen baýyrlastyq nıeti shynaıy. Bul – ekijaqty yntymaqtastyqty damytýǵa jaqsy negiz. Yntymaqtastyq baǵyttaryna keletin bolsaq, olardy sanamalaýǵa biraz ýaqyt ketedi. Óıtkeni ol qoǵamnyń barlyq salasyn qamtıdy. Árıne, qazirgi jaǵdaıda saýda-ekonomıkalyq jáne ınvestısıalyq jobalar, sondaı-aq kólik-logıstıkalyq ınfraqurylymǵa qatysty jobalar basymdyqqa ıe», - dedi ol.