«Qazteńizkólikfloty» ulttyq teńiz tasymaldaýshysy taǵy 2 konteıner tasymaldaýshy satyp alatynyn atap ótti.
Qazaqstan qurǵaq júk tasıtyn paromdardyń sanyn 10-ǵa jetkizýdi josparlap otyr, dep habarlaıdy Almaty-akshamy.kz QazAqparatqa silteme jasap.
Bul týraly Ortalyq komýnıkasıalar qyzmetinde ótken brıfıńide QR Indýstrıa jáne ınfraqurylymdyq damý mınıstrligi Kólik komıteti tóraǵasynyń mindetin atqarýshysy Qasym Tilepov aıtty.
«Qazirgi tańda Aqtaý portyndaǵy bizdiń ınfraqurylymnyń ótkizý qabileti 21 mln tonnadaı bolady. Bul baǵytta júktiń kez kelgen túrin tasymaldaı alamyz. Sondaı-aq, bizdiń ózimizdiń saýda flotymyz bar. Naqtyraq aıtsaq, 4 qurǵaq júk tıeýishimiz bar. Qazir bul júk tıeýishter Kaspıı teńizinde jumys istep júr», - degen komıtet ókili jyl aıaǵyna deıin «Qazteńizkólikfloty» ulttyq teńiz tasymaldaýshysy taǵy 2 konteıner tasymaldaýshy satyp alatynyn atap ótti.
Onyń sózine qaraǵanda, Qazir Kaspııde qurǵaq júk tasymaldaý isinde Ázerbaıjannyń monopolıasy ornaǵan.
«Jalpy, ózimizdiń parom flotymyzdy salsaq degen nıetimiz bar. Uzaq merzimdi keleshekte konteıner tasymaldaýshy paromdardyń sanyn 10-ǵa deıin jetkizsek degen josparymyz bar. Qazir Kaspııde Ázirbaıjan porohodtary monopolıa ornatqan», - dedi Qasym Tilepov.
Eske salsaq, QR Prezıdenti Qasym-Jomart Toqaev munaı tasymaldaýda Transkaspıı baǵdaryn damytýdy tapsyrǵan edi.