I Halyqaralyq TurkicSkills-2025 kásibı sheberlik chempıonaty óz máresine jetti.
Qazaqstan quramasy jarystyń basty jeńimpazy atanyp, túrki elderi arasynda tehnıkalyq jáne kásiptik maman daıarlaýda kóshbasshy ekenin dáleldedi, - dep habarlaıdy Aqshamnews.kz.
Elimizdiń júlde qorjyny 6 altyn, 2 kúmis medal jáne 1 «Úzdik medalónmen» tolyqty. Bul jeńis Memleket basshysynyń tapsyrmasyna sáıkes «Jumysshy mamandyqtar jyly» aıasyndaǵy reformalardyń nátıjeli júzege asyp jatqanyn aıǵaqtaıdy.
Esterińizge sala keteıik, 4-9 qazan aralyǵynda Aqtaý qalasynda Jumysshy mamandyqtar jyly aıasynda ótken TurkicSkills-2025 chempıonatyna Túrkıa, Ázerbaıjan, Majarstan, Ózbekstan, Qyrǵyzstan jáne Qazaqstannan 70-ke jýyq kolej stýdentteri men jas maman qatysty. Olar ınjenerıa, aqparattyq tehnologıalar, óndiris, robototehnıka jáne qyzmet kórsetý salalaryn qamtıtyn 10 quzyrettilik boıynsha baq synady.
Jarystyń jabylý rásiminde sóz sóılegen QR Oqý-aǵartý vıse-mınıstri Asylbek Ahmetjanov bul chempıonattyń túrkitildes memleketterdiń tehnıkalyq jáne kásiptik bilim berý uıymdarynyń arasynda Qazaqstannyń bastamasymen alǵash ret aýqymdy túrde uıymdastyrylǵanyn atap ótti.
«TurkicSkills chempıonaty – túrkitildes memleketter arasyndaǵy tehnıkalyq jáne kásiptik uıymdar yntymaqtastyǵynyń jańa kezeńine jol ashatyn mańyzdy shara. Bul kúnder dostyq pen ózara túsinistiktiń, yntymaqtastyq pen tájirıbe almasýdyń jarqyn úlgisine aınaldy», - dep atap ótti vıse-mınıstr.
WorldSkills International keńesiniń múshesi Reı Inglısh Qazaqstannyń halyqaralyq deńgeıdegi áleýetin erekshe atap ótti.
«Chempıonatynyń aýqymy men uıymdastyrylý sapasy – Qazaqstannyń álemdik deńgeıdegi kásibı sheberlik saıystaryn ótkizýge tolyq daıyn ekenin kórsetedi. Bul tájirıbe bolashaqta WorldSkills nemese WorldSkills Europe sıaqty halyqaralyq jarystardy qabyldaýǵa múmkindik beredi», – dedi ol.
Chempıonatty tamashalaýǵa 5 myńnan astam adam keldi, kolejder men kásiporyndar arasynda 100-ge jýyq yntymaqtastyq memorandýmy jasaldy.