Qyrkúıek aıynyń qorytyndysy boıynsha «Enbek.kz» elektrondyq eńbek bırjasynda 138,2 myń bos jumys orny jáne 130,6 myń túıindeme jarıalanǵan
Tamyz aıymen salystyrǵanda suranys 42,4%-ǵa (101,6 myńǵa) qysqarsa, usynys tek 5,7%-ǵa (7,9 myńǵa) tómendedi. Ár ekinshi bos jumys orny jumysshy mamandarǵa arnalǵan edi, - dep habarlaıdy Aqshamnews.kz.
Eń belsendi salanyń biri qaıtadan bilim salasy bolyp shyqty – onda 55 myńnan astam bos jumys orny (40%) tirkeldi. Taǵy 16,3 myń bos jumys orny «basqa qyzmet túrleri» (≈12%) boıynsha jarıalanyp, al 10 myń bos jumys orny densaýlyq saqtaý jáne áleýmettik qyzmet kórsetý salasyna (≈7%) tıesili boldy. Jalpy alǵanda, suranys usynystan 7,6 myńǵa asty.
Qyrkúıekte kóbinese ortasha bilikti mamandarǵa (57 myń bos jumys orny), odan keıin joǵary bilikti mamandarǵa (49 myń), eń az – biliktiligi joq adamdarǵa (32,2 myń) qajettilik baıqaldy. Usynys jaǵynan joǵary bilikti jumys izdeýshilerdiń túıindemeleri basym boldy – 55,4 myń, keıingi orynda ortasha biliktiler – 47,7 myń jáne biliktiligi joq adamdar – 27,5 myń. Osylaısha, qyrkúıekte jumys berýshiler kóbine ortasha bilikti kadrlardy izdese, jumys izdeýshiler arasynda joǵary bilikti mamandar kósh bastady.
Eń belsendi jumys berýshiler Astana (11,4 myń birlik) men Almaty (10,2 myń birlik) qalalarynda, sondaı-aq Pavlodar oblysynda (9,4 myń bos jumys orny) baıqaldy. Al jumys izdeýshiler tarapynan dástúrli túrde ońtústik óńirler kósh bastady: Túrkistan oblysynda – 15,7 myń, Shymkent qalasynda – 9 myń, Qyzylorda oblysynda – 8,5 myń túıindeme jarıalanǵan.
Qyrkúıekte jarıalanǵan bos jumys oryndarynyń ár ekinshisi (68 myń birlik) jumysshy mamandyqtaryna arnaldy, onyń ishinde 39%-yn (26,3 myń) naqty ekonomıkanyń kásiporyndary usyndy. Jumysshy mamandyqtar ishinde negizgi suranys óndiris salasyndaǵy bilikti jumysshylarǵa (23,5 myń birlik), kólik jáne logıstıka salasyna (5,9 myń) jáne bilim men tárbıe salasyna (4,4 myń) tústi. Naqty mamandyqtar boıynsha eń joǵary suranys avtokólik júrgizýshilerine (2 myń bos jumys orny), tárbıeshi kómekshilerine (1,8 myń) jáne sanıtar mamandaryna (1,7 myń) boldy.
Jas ereksheligine kelsek, ár ekinshi túıindeme 34 jasqa deıingi úmitkerler tarapynan ornalastyrylǵan – 63,8 myń birlik. Bul toptyń ishinde eń belsendileri – 16-24 jas aralyǵyndaǵy jastar (28 myń túıindeme). Ár tórtinshi túıindeme orta jastaǵy (35-44 jas) azamattarǵa tıesili – 33 myń birlik. Taǵy 17% (22,5 myń) – 45-54 jas aralyǵyndaǵy úmitkerlerge, al zeınetaldy jastaǵylardyń úlesi barlyq túıindemelerdiń 9%-yn (11,3 myń) qurady. Jynystyq quram boıynsha áıelder belsendirek boldy – EEB-de ornalastyrylǵan túıindemelerdiń 59%-y tıesili. Onyń ishinde ár ekinshi túıindeme joǵary bilikti eńbekke arnalǵan bos jumys oryndaryna baǵyttalǵan.
Qyrkúıek aıynda jumys berýshiler usynǵan eń joǵary jalaqy kólemi bas qurylysshy qyzmetinde baıqaldy (~705 myń teńge), odan keıin shahta oqpandaryn burǵylaý qondyrǵysynyń mashınısi (~700 myń teńge) jáne óndirýshi ónerkásiptegi ýchaske bastyǵynyń orynbasary (~681 myń teńge) qyzmetterinde tirkeldi. Al úmitkerlerdiń eń joǵary jalaqyǵa degen úmiti komersıalyq áýe laıneriniń ushqyshy (~2,8 mln teńge), IT-sektordaǵy tehnıkalyq dırektor (1,4 mln teńge) jáne qurylys salasyndaǵy bólim basshysy (~1,2 mln teńge) laýazymdary boıynsha boldy.
Osylaısha, qyrkúıekte maýsymdyq suranys faktorlary saqtaldy: bilim berý men tárbıe salasyndaǵy bos jumys oryndary áli de aldyńǵy qatarda tur. Óńirlerdegi demografıalyq aıyrmashylyqtar suranys pen usynys arasyndaǵy teńgerimdi aıqyndaýdy jalǵastyryp, megapolıster men ónerkásibi damyǵan oblystarda joǵary belsendilikti qoldap otyr. Bos jumys oryndarynyń jartysy jumysshy mamandyqtaryna tıesili boldy, bul olardyń eńbek naryǵyndaǵy qurylymdyq mańyzyn aıqyn kórsetedi.