Qazaqstanda mobıldi ınternet-trafık paıdalaný Túrkıa, Sıngapýr, Italıa, Belgıa jáne ózge de kóptegen elderge qaraǵanda birshama joǵary.
Soǵan qaramastan, qazaqstandyqtar úshin ınternet baǵasy tómendep keledi, dep habarlaıdy Almaty-akshamy.kz QazAqparatqa silteme jasap.
Beeline jelisi derekter trafıginiń kólemi 2021 jyly bir paıdalanýshyǵa úshten birge ulǵaıǵan. Operatordyń dereginshe, 2021 jyldyń 4-shi toqsanynda trafık paıdalaný kólemi bir paıdalanýshyǵa 14,1 Gb-qa jetti. Bul bir jyl burynǵy dál osyndaı kezeńdegi kólemnen 28,2 paıyzǵa joǵary.
Al Kcell-de 2021 jyldyń 4-shi toqsanynda bir paıdalanýshy qoldanǵan trafık kólemi 11,6 Gb boldy. Bul kórsetkish te 2020 jyldyń 4-shi toqsanyndaǵy derekten 18,3 paıyzǵa kóp. Aıta keterligi, Qazaqstandaǵy kórsetkish álem boıynsha ortasha deńgeıden birshama joǵary.
Elimiz mobıldi ınternet-trafıkti eń kóp paıdalanatyn elderdiń TOP-15-ine kiredi. Aıtalyq, ótken jyldyń 4-shi toqsanynda bir qazaqstandyq 14,1 Gb trafık qoldanǵan. Bul ortasha mánnen 46 paıyzǵa joǵary. Al bul kórsetkish Túrkıada – 13,6, Sıngapýrda – 13, Italıada – 12, Grekıada – 6,2, Belgıada 5,4 Gb-ty qurady.
Elimizde ınternet-trafık paıdalaný kóleminiń óte joǵary bolýy jahandyq jeliniń azamattarymyz úshin qoljetimdiligin kórsetedi. Munyń ústine trafık paıdalaný kóleminiń artýyna qaramastan, mobıldi ınternet quny arzandap ta keledi. Máselen, 2021 jyldyń qorytyndysynda 1Gb ınternet-trafıktiń ortasha baǵasy 110,5 teńge boldy. Bul bir jyl burynǵy kórsetkishten 9,7 paıyzǵa arzan.
Sonymen qatar uıaly telefonmen bir mınýt sóılesý quny da arzandaı túsýde. 2018 jyly 1 mınýt sóılesý quny 1,41 teńge bolsa, 2019 jyly – 1,34, 2020 jyly 1,2, 2021 jyly 1,19 teńge boldy.