Qaıyrymdylyq - adamnyń óz qalaýymen jasalady
Qorǵa aýdarylǵan qarjy ashyq jarıa etilip, halyq baqylap otyra alady. Bul týraly «Qazaqstan halqyna» qorynyń basqarma tóraǵasy Bolat Jámishev málim etti, dep habarlaıdy Almaty-akshamy.kz QazAqparatqa silteme jasap.
Bolat Jámishev ortalyq komýnıkasıalar qyzmetinde onlaın ótken baspasóz máslıhatyna qatysyp, qor qyzmetine qatysty basty jaıttardy tarqatyp berdi.
«Qorǵa túsken qarajat kólemin turaqty túrde halyqqa jarıa etip turamyz. Onyń ishinde bıznes ókilderimen qatar iri kompanıalar da bar. Buǵan deıin 2 ret qorǵa qandaı kólemde aqsha túsip jatqany týraly aqparat bergen bolatynbyz. Qaıyrymdylyqtan bólek, qorǵa lotereıa qyzmeti operatorlarynan qarajat túsedi. Sol sıaqty Úkimetpen anyqtalǵan utys tigý ortalyqtary men basqa da tabys kózinen qarajat aýdarylady. Bul jumysty endi qolǵa alamyz», - dedi B.Jámishev.
Tóraǵanyń aıtýynsha, jeke tulǵalar qor qyzmetiniń jandanýyna erikti túrde qol ushyn sozyp jatyr.
«Biz bireýdi qınap, erkinen tys aqsha aýdarýǵa májbúrleýge qarsymyz. Qaıyrymdylyq - adamnyń óz qalaýymen jasalatyn shara. Memlekettik organ qyzmetkerleriniń qorǵa aqsha jınap berýine qatysty shaǵymdy estip jatyrmyn. Árıne, biz de qarsymyz. Eger azamat ózi solaı sheship, jaqsylyq jasaý nıetimen aýdarsa, onda is basqa», - deıdi ol.