Bıyl Qazaqstan halqy Assambleıasy (QHA) óziniń 30 jyldyq mereıtoıyn atap ótýde. Osyǵan oraı Almatydaǵy Óńirlik komýnıkasıalar qyzmetinde QHA músheleriniń qatysýymen brıfıń ótti. Jıynda mádenı ortalyqtardyń etnosaralyq kelisimdi nyǵaıtýdaǵy róli talqylanyp, mereıtoıǵa arnalǵan is-sharalar jospary tanystyryldy, dep habarlaıdy aqshamnews.kz
Almaty qalasy QHA Aqsaqaldar keńesi tóraǵasynyń orynbasary Bolat Ospanovtyń aıtýynsha, Assambleıa túrli etnostardyń toǵysýyna, birliktiń nyǵaıýyna jáne ulttyq biregeıliktiń damýyna yqpal etti.
«Beıbitshilik pen kelisim saıasaty halyqtyń birligi – memlekettilikti qalyptastyrý, nyǵaıtý jáne damytýdaǵy negizgi faktor ekenin dáleldedi. Assambleıa alǵashqy jyldary eldegi etnostardyń múddesin qorǵaý maqsatynda qurylsa, búginde ol barlyq qazaqstandyq etnostardy birtutas halyq retinde biriktirý jolynda mańyzdy jumys atqarýda. Bul úderis azamattyq qaǵıdattarǵa, ortaq maqsattar men mindetterge, sondaı-aq biriktirýshi qundylyqtarǵa negizdelgen», – dep atap ótti B. Ospanov.
Spıker sonymen qatar QHA aıasynda kóptegen bastamalardyń júzege asyrylǵanyn aıtty. Olardyń qatarynda Analar keńesteri, Aqsaqaldar keńesi, «Assambleıa jastary» respýblıkalyq qoǵamdyq birlestigi, «Jomart jan» qaıyrymdylyq ortalyqtary, medıasıa keńesteri, Jas ǵalymdar klýby jáne elimizdiń barlyq óńirlerinde jumys isteıtin 34 Dostyq úıi bar. Bul azamattyq ınstıtýttar eldegi etnosaralyq kelisim men áleýmettik birlikti nyǵaıtýda mańyzdy ról atqaryp, myńnan astam etnomádenı birlestikti ortaq iske jumyldyrdy.
QHA qyzmetinde qaıyrymdylyq erekshe oryn alady. Onyń jarqyn mysaldarynyń biri – «Júrekten – júrekke» jobasy. Osy bastama aıasynda sý tasqynynan zardap shekken óńirlerge 1700 tonnadan astam gýmanıtarlyq kómek jetkizildi. Jalpy kómektiń kólemi 805 mıllıon teńgeden asty, al bul bastamaǵa 12 myńnan astam QHA eriktisi qatysty.
«Qazaqstan uıǵyrlarynyń Respýblıkalyq mádenı ortalyǵy» Qoǵamdyq birlestiginiń tóraǵasy Abdýlhalıl Dolkýntaı óz sózinde uıymnyń eń mańyzdy jetistikteriniń biri – eldegi beıbitshilikti saqtaý ekenin atap ótti. Bul turaqtylyq ekonomıkalyq, mádenı jáne áleýmettik salalardyń damýynyń negizi bolyp tabylady.
«Búginde memlekettik til barlyq etnostardy biriktiretin faktorǵa aınaldy, buǵan Qazaqstan halqy Assambleıasy aıtarlyqtaı úles qosty. Memleket Assambleıa arqyly etnostardyń tili men mádenıetin damytýǵa qolaıly jaǵdaı jasady. Assambleıa búkil qazaqstandyq qoǵamdy damytý arqyly jalpymemlekettik mindetterdi oryndaıdy», – dep aıtty ol.
Brıfıńke sondaı-aq profesor, tarıh ǵylymdarynyń kandıdaty, Almaty qalasy QHA múshesi Mendyganym Shaımerdenova qatysty. Ol óz sózinde QHA janyndaǵy ǵylymı-saraptamalyq keńes pen ǵylymı-saraptamalyq toptardyń qyzmeti týraly aıtty.
«QHA ǵylymı-saraptamalyq keńesteri Qazaqstannyń barlyq derlik iri qalalarynda jumys isteıdi. Biz etnosaralyq jáne konfesıaaralyq ózara is-qımyl máselelerin talqylap, ǵylymı maqalalardyń tusaýkeseri, elimizdiń damýyna eleýli úles qosqan kórnekti qaıratkerlerge arnalǵan halyqaralyq konferensıalar ótkizemiz. Konferensıa jınaqtary men monografıalary daıyndalyp, olardy oqý oryndary men etnomádenı birlestikter arasynda taratamyz», – dep atap ótti ol.
Sondaı-aq spıker aqpan aıynda belgili túrkitanýshy Erlan Espenbetovtiń qatysýymen jastardy Qazaqstannyń mádenıeti men salt-dástúrimen tanystyrýǵa baǵyttalǵan iri ǵylymı semınar ótkizý josparlanǵanyn aıtty.
Almatyda Assambleıanyń mereıtoıyn merekeleý aıasynda barlyǵy 400-den astam túrli is-sharalar, sonyń ishinde respýblıkalyq jáne óńirlik forýmdar, ǵylymı-tájirıbelik konferensıalar, dóńgelek ústelder, etnomádenı festıválder men qaıyrymdylyq aksıalary, shyǵarmashylyq keshter, sporttyq týrnırler jáne t.b. josparlanǵan. Qazaqstandyq biregeılikti nyǵaıtýǵa jáne mádenıetti damytýǵa yqpal etetin jobalarǵa erekshe nazar aýdarylady.