Halyqtyq shtab músheleri Shymkent qalasyndaǵy «Tassaı» ındýstrıalyq aımaǵyna baryp, kásipkerlermen jáne eńbek ujymdarymen kezdesý ótkizdi.
Bul is-sharada atom elektr stansıasy (AES) salý Qazaqstannyń ekonomıkalyq jaǵdaıyna qalaı áser etetini týraly keńinen aıtyldy. Shtab músheleri AES salynǵan jaǵdaıda turaqty jáne qoljetimdi elektr energıasyn qamtamasyz etý arqyly kásiporyndar men zaýyttar úshin óndiris shyǵyndaryn azaıtýǵa múmkindik týatynyn erekshe atap ótti.
Atap aıtqanda, uzaq merzimge arnalǵan mundaı elektr stansıasy elektr energıasynyń turaqty ári qoljetimdi tarıfterin usynyp, kásiporyndardyń tıimdiligin arttyrady. Bul óz kezeginde zaýyttar men fabrıkalardyń óndiris shyǵynyn azaıtyp, ishki naryqta básekege qabilettiligin arttyrýǵa jáne eksportty keńeıtýge jol ashady. Shtab músheleri AES salýdyń el ekonomıkasy úshin orasan zor serpin ákeletinin, ásirese, ónerkásiptik sektorda aldyńǵy qatarly elderdiń qataryna kirý múmkindigine ıe bolatynymyzdy atap ótti.
Sonymen qatar, Shtab músheleri kásipkerlerge Qazaqstannyń 2060 jylǵa qaraı kómirtegi beıtaraptyǵyna qol jetkizý boıynsha halyqaralyq mindettemeni qabyldaǵanyn eske saldy. Iaǵnı, kómirmen óndirilgen elektr energıasyn paıdalanatyn taýarlarǵa álemdik naryqta qosymsha salyq salynady, bul qazaqstandyq taýarlardyń básekege qabilettiligine teris áser etýi múmkin. Qazirgi ýaqytta Qazaqstan elektr energıasynyń 70%-yn kómir elektr stansıalarynan alyp otyr, bul eldiń uzaq merzimdi ekonomıkalyq damýynda úlken kedergi týǵyzýy yqtımal. Osyǵan oraı, AES salý eldegi elektr energıasy óndirisin kómirden atom energetıkasyna aýystyryp, qazaqstandyq ónimniń halyqaralyq deńgeıdegi básekege qabilettiligin arttyrýǵa strategıalyq mańyzǵa ıe ekenin atap ótti.
Kezdesý sońynda kásipkerler men jumysshylar aldaǵy referendýmǵa belsendi qatysyp, AES-ty qoldaýǵa daıyn ekendikterin bildirdi. Olardyń aıtýynsha, atom energetıkasyn damytý tek energetıkalyq táýelsizdikti qamtamasyz etip qana qoımaıdy, sonymen qatar Qazaqstanda ozyq tehnologıalardy engizýge, sheteldik ınvestısıalardy kóptep tartýǵa, óndiristi keńeıtýge jáne jańa jumys oryndaryn ashýǵa zor múmkindik beredi.
Kásipkerler atom energetıkasy Qazaqstannyń ekonomıkasynyń jańa deńgeıge kóterilýine, ǵylym men tehnologıany damytýǵa, sondaı-aq ónerkásip salasyn jańǵyrtýǵa qajetti mańyzdy qadam ekenine senimdilikterin jetkizdi. Osylaısha, AES-tyń salynýy elimizdiń uzaq merzimdi energetıkalyq strategıasynyń bir bóligi retinde qabyldanyp, onyń turaqty damý men básekege qabilettilikti arttyrýdaǵy róli aıryqsha bolatyny týraly ortaq pikir aıtyldy.