«Eńbek resýrstaryn damytý ortalyǵy» AQ Qazaqstannyń memlekettik jumyspen qamtý qyzmetiniń ókili retinde Dúnıejúzilik memlekettik jumyspen qamtý qyzmetteri qaýymdastyǵyna kirdi.
WAPES – bul jumyspen qamtý qyzmetine nemese eńbek naryǵyndaǵy saıasatty júzege asyrýǵa jaýapty memlekettik jáne úkimettik organdardyń halyqaralyq komersıalyq emes qaýymdastyǵy, dep habarlaıdy Almaty-akshamy.kz Eńbek jáne halyqty áleýmettik qorǵaý mınıstrligine silteme jasap.
Ony 1988 jyly Kanada, Fransıa, Germanıa, Nıderlandy, Shvesıa jáne AQSH Memlekettik jumyspen qamtý qyzmetteri Halyqaralyq eńbek uıymymen birlesip qurǵan bolatyn.
WAPES-ke qatysýshy elder ózara jahandyq kásibı baılanysty qoldaıdy, jumysqa ornalastyrý, kóshi-qon, kásiptik oqytý jáne memlekettik jumyspen qamtý qyzmetteriniń (budan ári – MJQ) birlesken jobalary men is-sharalary sheńberinde yntymaqtastyqty júzege asyrady.
Qazaqstannyń Memlekettik jumyspen qamtý qyzmetine oblys ortalyqtary men Astana, Almaty jáne Shymkent qalalaryndaǵy 20 eńbek mobıldiligi ortalyǵy, aýdandar men qalalarda ornalasqan 207 mansaptyq ortalyq, jumyspen qamtý máseleleri jónindegi jergilikti organdar kiredi.
Jumyspen qamtý salasyndaǵy saıasatty QR Eńbek jáne halyqty áleýmettik qorǵaý mınıstrligi aıqyndaıdy. ERDO óz kezeginde eńbek naryǵyn aqparattyq-taldamalyq súıemeldeýdi, jumyspen qamtýǵa járdemdesýdiń belsendi sharalaryn, jumyspen qamtý qyzmetin ádisnamalyq qoldaýdy, áleýmettik-eńbek salasynyń biryńǵaı aqparattyq júıesin damytýdy jáne súıemeldeýdi qamtamasyz etedi.
Qaýymdastyqtyń múshesi bola otyryp, Qazaqstan jumyspen qamtý jáne eńbek naryǵy salasynda aqparat almasý maqsatynda WAPES-ke qatysýshy eldermen baılanysta bolyp, MJQ salasyndaǵy úrdister týraly habardar bolady, WAPES júrgizetin jobalar men zertteýlerge qatysa alady.
Bul Qazaqstannyń jumyspen qamtý qyzmetiniń kásibı áleýetin arttyrýǵa jáne onyń qyzmetine ozyq halyqaralyq tájirıbeni engizýge, sondaı-aq MJQ strategıasy men qyzmeti boıynsha jahandyq dıalogqa úles qosýǵa, Qazaqstannyń halyqaralyq arenadaǵy jumyspen qamtý salasyndaǵy jetistikteri týraly málimdeýge múmkindik beredi.