Eki jyl ishinde óz kórsetkishterimizdi josparly túrde jaqsarta aldyq
Qazaqstan BUU reıtıńinde elektrondyq úkimetti damytý boıynsha 28-oryndy ıelendi. Bul týraly búgin óziniń Instagram paraqshasynda QR Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın jazdy, dep habarlaıdy Almaty-akshamy.kz.
«Dostar! Sizdermen jaqsy jańalyqty jetkizgim kelip otyr! Qazaqstan BUU (UN Global E-Government Development Index) reıtıńinde «elektrondyq úkimetti» damytý boıynsha 28-oryndy ıelendi. Osylaısha, 29-shy qatardan bir orynǵa joǵary kóterildik.
Reıtıńti shyǵarý barysynda BUU sarapshylary elektrondyq qyzmetter men adamı kapıtaldyń damýyn, sondaı-aq telekomýnıkasıalyq ınfraqurylymdy baǵalaıtynyn eske sala keteıin. Bul reıtıń sońǵy ret 2020 jyly jarıalanǵan bolatyn. Biz koronavırýs pandemıasyna jáne basqa da qıyndyqtarǵa qaramastan, eki jyl ishinde óz kórsetkishterimizdi josparly túrde jaqsarta aldyq.
Sıfrlyq úkimetti damytý Memleket basshysynyń erekshe baqylaýynda, Qasym-Jomart Kemeluly sıfrlyq transformasıa eldiń básekege qabilettiligin aıqyndaıtynyn atap ótti. Biz osymen toqtap qalmaı, otandyq aqparattyq-kommýnıkasıalyq tehnologıalardyń sapasyn arttyrý baǵytynda tıisti jumysty jalǵastyratyn bolamyz. Bolashaqta kóshbasshylardyń qatarynan kórinip, BUU reıtıńinde 20-shy oryndy ıelenýge tyrysamyz!» - delingen habarlamada.