Azız Qojambetov Qazaqstan boks federasıasynyń (QBF) atqarýshy dırektory bolyp taǵaıyndaldy, dep habarlaıdy Almaty-akshamy.kz federasıanyń baspasóz qyzmetine silteme jasap.
Bul jaıly buıryqqa búgin qol qoıyldy.
Azız Esentaıuly osyǵan deıin QBF prezıdentiniń keńesshisi qyzmetin atqaryp keldi. Halyqaralyq dárejedegi tájirıbesiniń arqasynda jaqynda ǵana aıaqtalǵan Azıa boks konfederasıasynyń Kongresinde atalǵan uıymnyń dırektorlar keńesiniń múshesi bolyp saılandy. Tórt tildi jetik meńgergen maman 2010-2014 jyldar aralyǵynda ASBC atqarýshy dırektory qyzmetin atqarǵan. World Series of Boxing aıasynda óner kórsetken dańqty «Astana Arlans» klýbynyń negizin qalaǵandardyń biri.
«Qazaqstan boks federasıasy jáne elimizdegi barsha boks qaýymdastyǵy Azız myrzany shyn júrekten quttyqtaıdy. Elimizdegi №1 sport túriniń damýyna sport salasynda jınaǵan mol tájirıbesi óz septigin tıgizedi degen senimdemiz. Jańa qyzmette sáttilik, jáne otandyq bylǵary qolǵap sheberlerine jeńis tileımiz!» - delingen habarlamada.