Ózbektiń jeti birdeı boksshysy olımpıadanyń shırek fınalyna shyqty. Demek Ózbekstan quramasynda kemi jeti qola medal bar degen sóz.
Al, bizdiń boksshylardan tek Nurbek Oralbaı ǵana 1/4 fınalǵa ótti. Bul óte uıat jaǵdaı. Qazaqstan boks derjavasy degen dańǵazany qoıý kerek. Kináni tóreshiler men uıymdastyrýshylardan izdeý de uıat.
Shyn myqtylar sharshy alańda oınaqtap júrip jeńse, eshkim jeńisin julyp almas edi. Ózbekterdi sýdıalar súırep shyǵardy dep aıta almaımyz. Qaı-qaısysy bolsa da janyp tur. Rıngte janyn berip, sońǵy sekýndtqa deıin shaıqasýda. Al, bizdiń jigitterden mundaı jankeshtilik baıqamadym.
Buǵan árıne jattyqtyrýshylar men Bas bapker kináli. Eger sportshyda namys, minez, ulttyq rýh bolmasa bári beker. Jetektegen tazy ań almaıdy. Boksshylardy tek aqshamen ǵana qyzyqtyrý azdyq etedi. Kózinde ot, keýdesinde shoq bar jigitterdi quramaǵa shaqyrý kerek edi.
Áıtpese boksshylardyń alańsyz jattyǵý jasaýyna memleket bar jaǵdaıdy jasady. Alaıda nátıje nól. Tokıo olımpıadasyndaǵy qatelikterden sabaq almaǵanymyz kórinip tur. Sondyqtan sport salasyna reforma kerek.
Ár federasıanyń qulaǵyn ustap otyrǵan olıgarhtar men shen-shekpendilerdi túgel jumystan bosatý kerek. Ornyna sportty biletin, túsinetin kásibı mamandardy qoıý kerek. Tek sol kezde ǵana nátıje bolady.
Áıtpese bar ómirin sportqa sarp etken talaı sańlaq eki qolǵa bir kúrek tappaı sandalyp júr. Kezinde kók baıraǵymyzdy jelbiretip, ánurandy asqaqtatqan azamattar qazir qaırańda qalǵan kemedeı jaǵaǵa shyǵyp qaldy. Solarǵa jaqsy aılyq tólep, chempıondarymyzdy jastardy tárbıeleýge tartý kerek. Tek sonda ǵana nátıje bolady.
Áıtpese shetelden shaqyrǵan bapkerler men legıonerlerge qazaqtyń tek aqshasy kerek. Kelisim-sharty aıaqtalǵan kúni olar aldy-artyna qaramaı taıyp turady. Artynda suraýy joq. Sondyqtan qazaq sportyn damytýǵa tek qazaqtar ǵana múddeli.