Bıdaı qory búginde 7,4 mln tonnany quraıdy.
Qazaqstanda ishki qajettilikterdi qamtamasyz etý jáne eksporttyq kelisimsharttardy jabý úshin bıdaı men unnyń jetkilikti kólemi bar. Qazirgi ýaqytta eksporttaýǵa shekteýler engizý josparlanbaıdy. Bul týraly Aýyl sharýashylyǵy mınıstri Erbol Qarashókeev málimdedi, dep habarlaıdy Almaty-akshamy.kz Eldala.kz cilteme jasap.
Qazaqstandaǵy bıdaı qory búginde 7,4 mln tonnany quraıdy, onyń 6 mln tonnasy – azyq-túliktik bıdaı. Sonymen qatar, 144 myń tonna un bar, mınıstrdiń aıtýynsha, bul kólem ishki tutyný úshin shamamen 300 kúnge jetedi.
«Biz kez kelgen jyldary bıdaı, un jáne makaron ónimderimen qamtamasyz etip kelemiz. 6 mln tonna bar, bul tek ishki qajettilik úshin ǵana emes, biz de eksporttyq naryqtarymyzǵa astyq eksporty boıynsha ózimizdiń barlyq kelisimsharttyq mindettemelerimizdi jetkizip, oryndaıtyn bolamyz», - dep málimdedi Erbol Qarashókeev.
Ol Qazaqstanda astyq jáne basqa da azyq-túlik ónimderimen jaǵdaı tolyǵymen turaqty ekenin atap ótti.
Esterińizge sala keteıik, Reseı EAEO elderine, sonyń ishinde Qazaqstanǵa bıdaı eksporttaýǵa tyıym saldy. Osydan keıin Qazaqstanda bıdaı baǵasy joǵary kóterilip, tonnasy 122 myń teńgeden 128-130 myń teńgege deıin ósti. Un tartýshylar QR-ǵa astyq eksportyna baj salyǵyn engizý múmkindigin qarastyrýdy surady.