5-7 qarasha kúnderi Vashıngton qalasynda (AQSH) álemdik avıasıa salasyndaǵy negizgi oqıǵa bolyp tabylatyn jyl saıynǵy Air Traffic Control Association (ATCA) 2024 konferensıasy ótti.
İs-shara sheńberinde avıasıalyq saladaǵy úzdik jetistikterdi dástúrli túrde atap ótetin bedeldi ATCA marapattar baǵdarlamasy qarastyryldy, dep habarlaıdy aqshamnews.kz Kólik mınıstrligine silteme jasap.
ATCA marapattar baǵdarlamasy úsh sanatty qamtıdy: áýe qozǵalysyna qyzmet kórsetý, ındýstrıa jáne shaǵyn bıznes, sondaı-aq áskerı eńbek jetistikteri. Uıymdastyrýshylar bar-joǵy 10 nomınasıa usyndy. «The David J. Hurley Memorial Award for Aviation Traffic Management» solardyń biri bolyp tabylady. Ol álemdegi áýe qozǵalysyna qyzmet kórsetý salasyndaǵy úzdik jetistikterdi atap kórsetedi. Joǵaryda atalǵan sanatqa qatysý úshin 40-tan astam elden ótinim kelip túsken.
Jyl saıynǵy ATCA konferensıasynyń qorytyndysy boıynsha «The David J. Hurley Memorial Award for Aviation Traffic Management» nomınasıasynda «Qazaeronavıgasıa» RMK jeńimpaz bolyp tanyldy. Bul rette, 2023 jyly atalǵan sanatta AQSH Federaldyq azamattyq avıasıa basqarmasynyń (FAA) ókilderi úzdik atanǵan bolatyn.
«Qazaeronavıgasıa» RMK mamandary «Aqtóbe aýdandyq dıspecherlik ortalyǵynyń jaýapkershilik aımaǵynda áýe qozǵalysyna qyzmet kórsetýdi jaqsartý úshin dınamıkalyq sektorǵa bólýdi zertteý jáne ázirleý» taqyrybyndaǵy jobany usynyp, ol úzdik dep tanyldy. Ǵylymı jumystyń avtorlary «Qazaeronavıgasıa» RMK áýe qozǵalysyn uıymdastyrý jónindegi departamenttiń áýe keńistigin uıymdastyrý bóliminiń jetekshi mamandary Nursultan Tompıev, Áset Ahmetbaev jáne Mádı Asylhanov bolyp tabylady.
Dınamıkalyq sektorǵa bólý áýe keńistigin ońtaılandyrýǵa, avıadıspecherlerge túsetin júktemeni azaıtýǵa jáne ushý aqparaty aýdanynyń áýe keńistiginde ótkizý qabiletin arttyrýǵa múmkindik beredi. Jobada Voronoı dıagramsynyń ádisin paıdalana otyryp, Aqtóbe ushý aqparaty aýdanynyń áýe keńistigin ýaqytsha bólýdiń ǵylymı tásili qoldanyldy. Atalǵan joba tabysty iske asyrylǵan jaǵdaıda, aldaǵy ýaqytta Qazaqstan Respýblıkasynyń áýe keńistigindegi basqa da jaýapkershilik aımaqtarynda dınamıkalyq sektorǵa bólýdi engizý kezinde osy ádisnamany qoldaný múmkindigi týyndaıdy.
«Qazaeronavıgasıa» RMK mamandary Qazaqstanda alǵashqy bolyp bedeldi halyqaralyq ATCA syılyǵyn alyp otyr. Bul elimizdiń avıasıa salasyn damytýdaǵy jáne onyń halyqaralyq arenadaǵy pozısıasyn nyǵaıtýdaǵy taǵy bir mańyzdy qadam bolyp tabylady.