Qazir Batys Saharada 6, Lıvandaǵy ýaqytsha kúshterde 9 áskerı qyzmetshi qyzmet atqaryp júr.
Parlament Prezıdent Qasym-Jomart Toqaevtyń 430 áskerı qyzmetshini BUU-nyń bitimgerlik mısıalaryna jiberý týraly usynysyn qoldady, dep habarlaıdy Almaty-akshamy.kz
Parlamenttiń birlesken otyrysynda Memleket basshysynyń qazaqstandyq áskerılerdi bitimgerlik mısıalarǵa jiberý týraly usynysy qaraldy. Prezıdenttiń usynysyn Qorǵanys mınıstri Rýslan Jaqsylyqov oqyp berdi.
Aıtýynsha, qazirgi ýaqytqa deıin Qarýly Kúshterdiń áskerı qyzmetshileri, Parlament qaýlylaryna sáıkes, beıbitshilik pen qaýipsizdikti qoldaý jónindegi halyqaralyq mindettemeni oryndaý úshin BUU bitimgershilik mısıalaryna jiberilip otyrdy. Qazir Batys Saharada 6, Lıvandaǵy ýaqytsha kúshterde 9 áskerı qyzmetshi qyzmet ótkerip jatyr.
«Óńirde jáne álemde bolyp jatqan sońǵy oqıǵalar qaýipsizdikke tónetin syn-qaterdi joqqa shyǵarmaıdy. Osyǵan baılanysty áskerdiń jaýyngerlik ázirligin odan ári nyǵaıtý, qazirgi syn-qaterge qarsy áreket etýde tájirıbe jınaqtaý máselesi ózekti bolyp otyr. Osy turǵyda, Uıym jarǵysynyń jetinshi taraýyna sáıkes, Qarýly Kúshterdiń Ortalyq Afrıkada, Kongo Demokratıalyq Respýblıkasynda, Malıde bitimgershilik mısıaǵa qatysýyn keńeıtýdi oryndy dep sanaımyn», - delingen Prezıdenttiń usynysynda.
Qazaqstan shtab ofıseri, áskerı baıqaýshy retinde qazirgi ýaqytta mısıada anaǵurlym tapshy bolyp tabylatyn jaıaý ásker, medısınalyq, barlaý, ınjenerlik, áskerı polısıa bólimshesin bólýge daıyn. Bul tájirıbe áskerimizdiń jaýyngerlik daıarlyǵyn jetildirý, olardy odan ári damytý boıynsha usynys daıyndaý úshin qoldanylady.
Osynyń negizinde, Konstıtýsıanyń 53-babyna sáıkes, bitimgershilik kontıngent - jalpy sany 430 áskerı qyzmetshini:
Ortalyq Afrıkadaǵy turaqtandyrý jónindegi mısıaǵa;
Kongo Demokratıalyq Respýblıkasyndaǵy turaqtandyrý jónindegi mısıaǵa;
Malıdegi turaqtandyrý jónindegi mısıaǵa;
«Lıvandaǵy ýaqytsha kúshter» mısıasyna jiberý týraly usynys engizildi.
Parlament depýtattary Qasym-Jomart Toqaevtyń usynysyn qoldady.
Aıta keteri, 2014 jyldan bastap 45 ofıser Batys Saharadaǵy, Kot-d’Ivýardaǵy, Lıvandaǵy mısıaǵa áskerı baıqaýshy jáne shtab ofıseri retinde, 2018 jyldan bastap 520 áskerı qyzmetshi bitimgershilik bólimshe quramynda «Lıvandaǵy ýaqytsha kúshter» mısıasyna qatysty.