Ekijaqty kezdesý Japonıada ótti
Qazaqstan Japonıada ótetin EXPO kórmesine qatysady, dep habarlaıdy Almaty-akshamy.kz.
Azattyq Ruhy-nyń málimetine súıensek, «QazExpoCongress» UK» AQ basshylyǵy EXPO 2025 Osaka Uıymdastyrý komıtetiniń ókilderimen kezdesip, Qazaqstannyń kórmege qatysý shartyna qol qoıyldy. Qazaqstan tarapynan shartqa Ulttyq seksıanyń bas komısary Dáýlet Erkimbaev, Japonıa tarapynan qaýymdastyqtyń Bas hatshysy Hiroyuki Ishige, EXPO 2025 Osaka Dúnıejúzilik kórmesiniń Bas komısary Koji Haneda qol qoıdy.
«Japonıada ótetin EXPO 2025 kórmesine daıyndyqty bastap kettik. Uıymdastyrý isine qatysty barlyq suraq pen «Ómirlerdi qutqarý» taqyryptyq klasterinde ornalasatyn pavılonymyzdy tolyq pysyqtaýdamyz. Kórmeniń bastalýyna eki jyl bar, biraq is júzinde az ýaqyt qaldy. Kórme 2025 jyldyń 13 sáýirinde ashylyp, 13 qazanynda aıaqtalady. Uıymdastyrýshylardyń boljamy boıynsha, kórmege álemniń 150 elinen 28 mıllıonnan astam adam kelýi tıis, sondaı-aq 25 halyqaralyq uıym ókilderiniń qatysýy boljanady», – dedi Erkimbaev.
EXPO-2025 Japonıanyń Osakadaǵy Iýmeshıma jasandy aralynda ótedi. Kórmeniń taqyryby «Bizdiń ómirimiz úshin bolashaq qoǵamyn qurý» dep atalady. Ol qosymsha taǵy úsh taqyrypshadan turady: «Ómirlerdi qutqarý», «Quqyq men múmkindikterdi keńeıtý» jáne «Ómirlerdi biriktirý». Kórmeniń jalpy aýdany shamamen 155 ga quraıdy. Qazaqstan pavılony Italıa, Nıderland, Sıngapýr jáne Bolgarıa pavılondarymen kórshiles ornalasatyn boldy.