Bul týraly Ǵylym jáne joǵary bilim mınıstri Saıasat Nurbek óziniń Telegram-arnasynda jazdy
"Til-Qazyna" ortalyǵy qazaqsha mátindi dybysqa aınaldyratyn Telegram-bot ázirledi, dep jazady Almaty-akshamy.kz.
Vedomstvo basshysynyń aıtýynsha, bul ınovasıalyq bot - komýnıkasıa salasyndaǵy úlken jańalyq. Sondaı-aq erekshe qajettiligi bar adamdarǵa, qazaq tilindegi aqparatqa tez qol jetkizgisi keletinderge jańa múmkindikter beredi.
"Microsoft Azure ıntegrasıasy arqyly Telegram-bot qazaq tilinde jazylǵan mátindi joǵary deńgeıde dybysqa aınaldyryp, túrlendire alady. Bul qazaq tilindegi kitaptardy, jańalyqtar men maqalalardy, oqý materıaldaryn jáne basqa da mátinderdi ártúrli jaǵdaıda paıdalanýǵa múmkindik týǵyzady. Osyǵan oraı paıdalanýshylar atalǵan botty óz kontaktilerine qosyp, oǵan birden qazaq tilindegi mátindi jiberý arqyly jańa fýnksıonaldy qoldana alady", - dep jazdy mınıstr.
Saıasat Nurbek botty Telegramm kanalynda @kztts_bot ataýy arqyly tabýǵa bolatynyn jetkizdi.
"Bot mátindi jyldam ári sapaly dybystap, paıdalanýshyǵa aýdıofaıldy kez kelgen ýaqytta tyńdaı alatyndaı etip qaıta joldaıdy. Qazirgi tańda bot Aıgúl men Dáýlettiń daýysy arqyly dybystalady", - dedi ol.
Mınıstrdiń sózinshe, bul Telegram-bot qazaq tilindegi aqparatqa qoljetimdilikti arttyrý úshin jańa múmkindikter ashady.