Almaty-akshamy.kz saıtynda jarıalanǵan búgingi jańalyqtar – kún kerýeni
Nekesiz balanyń sany kóbeımeı me?
EKU-ǵa resmı nekege turmaǵan juptar da qatysa alady. Almatyda bıyl ekstrakorporaldy uryqtandyrý baǵdarlamasy boıynsha 3241 kvota bólindi.
MÁMS aıasynda halyqqa qoljetimdi bolǵan qyzmettiń biri — ekstrakorporaldy uryqtandyrý nemese EKU prosedýrasy.
«Álippeden» demalys...
Birinshi synyptyqtar taǵy demalady. Qosymsha demalys 5-11 aqpan aralyǵynda. Birinshi synyp oqýshylary qosymsha qysqy demalysta 7 kún demalady.
Terorıstik uıymǵa qatysy bolýy múmkin
Osyǵan baılanysty 22 jastaǵy qazaqstandyq Stambýldan Almatyǵa deportasıalandy. Tergeý materıaldaryna sáıkes Túrkistan oblysynyń týmasy 2020 jyly Sırıaǵa ketip, onda qarýly toptardyń biriniń múshesi bolǵan.
UQK Qylmystyq kodekstiń 257-babyna sáıkes terorıstik áreketke qatysý faktisi boıynsha qylmystyq isti tergep-tekserýde.
Qasteevtiń izbasarlary
Oqýshylar kórmesi «Ábilhan Qasteevtiń 120 jyldyǵy» halyqaralyq baıqaýynyń aıasynda uıymdastyrylǵan.
Onda músin, anımasıa jáne sándik-qoldanbaly óner týyndylary qoıyldy. Qatysýshylar balań kartınalaryn halyq sýretshisiniń ónerin zerdelep, shyǵarmalarynan shabyt alyp, ár túrli tehnıka qoldaný arqyly beınelegen.
Sorpa «shabýyly»
Fransıada eki eko-belsendi Parıjdegi Lývrda qoıylǵan Leonardo da Vınchıdiń «Mona Lıza» kartınasyna sorpa quıǵan qutylardy laqtyrdy. Áıgili shedevr oq ótkizbeıtin áınekpen qorǵalǵandyqtan zardap shekken joq.
«Qaısysy mańyzyraq, óner me, álde durys jáne turaqty tamaqtaný quqyǵy ma? Bizdiń aýylsharýashylyq júıemiz nasharlaǵan. Bizdiń fermerler jumystarynan aıyrylýda. Árbir úshinshi fransýz kún saıyn tamaqtanbaıdy», — dep aıqaılady sorpa shashqan belsendiler.
Kabırhan degen kim?
Kabırhan – Dýbaıda ótken jarysta óziniń artyqshylyǵyn taǵy bir márte dáleldegen, Kentýkkıden satyp alynǵan asyl tuqymdy arab jylqysy. Bul joly ol Longines usynǵan Al Maktoum Challenge (1-top) jeńimpazy atandy, ıaǵnı onyń qojaıyny Tilek Muqanbetqalıev 1 mıllıon dollar kólemindegi bas júldeni jeńip aldy.
«Úsh te bolsa kúsh» deımiz be?
«Kanvondaǵy» jasóspirimder Olımpıadasy 2 aqpanda máresine jetedi. Qazaqstan qorjynyndaǵy 1 altyn, 2 qola medalimen 15-satyda. Elimizge alǵashqy altyndy Ilá Mızernyh syılasa, Polına Omelchýk (short-trek) pen hokeıden Ulttyq qurama qola medal jeńip alǵan.
Vıdeonyń da óz mádenıeti bar...
Meıramhanaǵa, toıǵa, kez kelgen is-sharaǵa jolyńyz túsip, barsańyz qolyna telefon ustap, vıdeo túsirip júrgenderdi kóresiz. Vıdeo túsirýdiń ózindik etıkasy baryn birimiz bilsek, birimiz bilmeımiz. Zań boıynsha munyń da erejesi, talaby, jazasy bar.
«Oskar» Almatyda!
Qazaq memlekettik sırkiniń ekvılıbrısi Taısıa Demıdova Monte-Karlodaǵy 46 Halyqaralyq sırk festıvali aıasynda ótken «Jańa urpaq» 11 festıvalinde «Qola ıýnıor» syılyǵynyń ıegeri atandy. Bul baıqaý álemdegi eń bedeldilerdiń biri bolyp sanalady jáne sırk «Oskary» dep atalady.
«Bul - sırk ónerindegi eń bedeldi marapattardyń biri. Biz Taısıamyzǵa óte qýanyshtymyz jáne onyń mansabynda úlken bıikterge jetetinine senimdimiz. Almaty ákimdigi ártisterimizdiń shyǵarmashylyq áleýetin damytýǵa kóp kóńil bóledi», - dedi Almaty qalasy mádenıet basqarmasynyń basshysy Ǵanı Maılybaev.
ChatGPT qazaqtana ma?
Ǵylym jáne joǵary bilim mınıstri Saıasat Nurbektiń aıtýynsha, elimizde Jasandy ıntellekt komıteti qurylady.
"Bizdiń ınstıtýttarymyz ázirlegen aýqymdy til modeli shyǵady. Ol modeldi sýperkompúterde jattyqtyramyz da, qazaqsha túsinetin ózimizdiń tuńǵysh ChatGPT paıda bolady. Qazir búkil arab elderinde ózderiniń til modelderin jasap jatyr. Olarǵa jeńildeý. Óıtkeni, arab tilinde shyqqan ǵylymı eńbek, jazba ádebı mádenıet kóp. Ókinishke qaraı, ózimizdi qansha maqtasaq ta, bizde ondaı myńdaǵan jyldyq kitaphanalar joq. Mádenıetimiz de, órkenıetimiz de aýyzsha. Sondyqtan Mádenıet jáne aqparat mınıstrligimen birlesip búkil BAQ-tyń, kınoqordyń muraǵaty negizinde osy baǵytta jumys istep jatyrmyz. Sony jeńildetý úshin Oksford ýnıversıteti kómektesti", – dedi mınıstr.